Një anije e ngarkuar me karburant është bllokuar në portin e Durrësit, pasi gjatë kontrolleve të ushtruara nga shërbimet doganore është konstatuar një sasi më e madhe karburanti nga ajo e pasqyruar në dokumentacionin zyrtar.
Sipas verifikimeve, në anije janë gjetur 16.8 tonë karburant më shumë se sasia e deklaruar në dokumentet doganore.
Dyshohet se kjo sasi është mbajtur e padeklaruar nga subjektet përgjegjëse. Ndërkohë, autoritetet kanë nisur procedurat ligjore përkatëse për të zbardhur rrethanat e rastit dhe për të përcaktuar përgjegjësitë.
Njoftimi i Degës Doganore Durrës:
Në kuadër të kontrolleve doganore, shërbimet e Degës Doganore Durrës ushtruan kontroll fizik në një anije, që ndodhej e akostuar në një nga kalatat e portit, pas informacioneve operative për diferenca në sasinë e deklaruar të karburantit.
Gjatë kontrollit të punonjësve të doganës u evidentuan rreth 16,8 tonë karburant të dyshuara si të padeklaruara dhe të nxjerrë kontrabandë nga anija. Për rastin u hartua procesverbali i konstatimit fizik dhe u vendos bllokimi i anijes për të vijuar me ndjekjen e procedurave të mëtejshme verifikuese ligjore.
Dega Doganore Durrës njofton se do të vijojë kontrollet dhe veprimet operative për parandalimin e kontrabandës, mbrojtjen e interesave financiare të shtetit dhe zbatimin e legjislacionit doganor.







