Kryeministri i Kosovës, Albin Kurti, gjatë vizitës zyrtare në Irlandë, ka zhvilluar një takim me përfaqësues të Komitetit për Çështje të Bashkimit Evropian në Parlamentin irlandez, ku në fokus të diskutimeve ka qenë procesi i integrimit evropian të Kosovës.
Në takim ishin të pranishëm kryetari i Komitetit, Barry Ward, anëtari Rúairí Ó Murchú, sekretari Ivan Farmer, si dhe drejtori për Zgjerim dhe Njësinë për Evropën Juglindore të BE-së, Frank Smyth.
Përmes një reagimi në rrjetet sociale, Kurti bëri të ditur se gjatë bisedës ka kërkuar angazhim më të madh për përshpejtimin e rrugës së Kosovës drejt Bashkimit Evropian.
Ai theksoi rëndësinë që Këshilli i BE-së t’i kërkojë Komisionit Evropian të japë opinionin e tij për aplikimin e Kosovës për anëtarësim, i cili është dorëzuar në dhjetor të vitit 2022.
Sipas kryeministrit kosovar, marrja e statusit të vendit kandidat dhe nisja e negociatave për anëtarësim përbëjnë dy hapa vendimtarë për ecurinë e mëtejshme të këtij procesi.
Kurti nënvizoi gjithashtu se integrimi evropian nuk duhet parë vetëm si arritje përfundimtare, por edhe si një proces reformash që sjell përfitime të drejtpërdrejta për qytetarët dhe kontribuon në forcimin e shtetit.
“Për ne procesi nuk është më pak i rëndësishëm se arritja në cak, sepse me përmbushjen e reformave, përveçqë lëvizim përpara në rrugën evropiane, përfitojnë qytetarët dhe forcohemi si shtet”, u shpreh Kurti.
Gjatë takimit, kreu i qeverisë së Kosovës falënderoi gjithashtu Irlandën për mbështetjen e vazhdueshme ndaj vendit të tij. Ai vlerësoi në veçanti kontributin irlandez në strehimin e refugjatëve dhe pjesëmarrjen në misionin paqeruajtës të KFOR-it.
