Arrestimi i Leli Kajës nga SPAK për korrupsion i hapi rrugë ndryshimit të drejtimit të kompanisë publike “Eco-Elb” në Elbasan. Në vend të tij, Asambleja e Ortakëve ka emëruar Alian Zabelin, një emër që nuk është i panjohur për drejtësinë, pasi katër vite më parë u arrestua nën dyshimin për shpërdorim detyre, në një çështje që lidhej me një ndërtim pa leje në zonën e Treganit.
Zabeli do të drejtojë për tre vitet e ardhshme shoqërinë që administron shërbimet e menaxhimit të mbetjeve në Elbasan, përfshirë edhe impiantin e njohur si inceneratori fantazmë. Vendimi për emërimin e tij është marrë pak ditë më parë nga Asambleja e Ortakëve, ku Bashkia e Elbasanit, e drejtuar nga Gledjan Llatja, është aksionerja kryesore. Mandati i administratorit të ri do të zgjasë deri në tetor 2027.
Por përpara se të merrte drejtimin e “Eco-Elb”, Alian Zabeli ka punuar në Inspektoratin Ndërtimor Vendor të Elbasanit, ku ka qenë edhe në varësi të Leli Kajës. Në dhjetor të vitit 2021, emri i tij u përfshi në një hetim policor për një objekt pesëkatësh të ndërtuar pa leje në fshatin Tregan, pranë llixhave të Elbasanit.
Policia kishte konstatuar pranë hotelit “Puka” një godinë në formë U-je, me pesë kate dhe me punimet e muraturës të përfunduara. Sipas të dhënave të asaj kohe, secili kat kishte një sipërfaqe prej rreth 1 mijë metrash katrorë, ndërsa i gjithë objekti zinte 5 mijë metra katrorë.
Pas konstatimit të paligjshmërisë së ndërtimit, oficerët e Policisë Gjyqësore njoftuan inspektorët e zonës, Alian Zabelin dhe Denis Ziun. Dy punonjësit shkuan në terren dhe hartuan procesverbalin e konstatimit të kundërvajtjes administrative. Në dokument u evidentua se objekti po ndërtohej në tokën e pronarit, i cili kishte marrë leje zhvillimore, por nuk kishte përfunduar procedurat për pajisjen me leje ndërtimi.
Menjëherë pas këtij veprimi, të dy inspektorët u arrestuan në flagrancë, të dyshuar për shpërdorim detyre.
Hetimet e asaj kohe nxorën në pah se ndërtimi kishte nisur që në vitin 2019, kur kryeinspektor i Inspektoratit Ndërtimor Vendor ishte pikërisht Leli Kaja. Në vijim të dëshmive të mbledhura nga grupi hetimor, një punonjës i inspektoratit deklaroi se në sistem rezultonte një masë administrative e vendosur ndaj këtij subjekti që në vitin 2019, por nuk kishte dijeni nëse ajo ishte ekzekutuar.
I njëjti punonjës sqaroi se leja zhvillimore nuk i jepte të drejtë subjektit të niste punimet dhe se në atë periudhë detyrën e kryeinspektorit e mbante Leli Kaja, i cili më pas u pasua nga Mario Qosja deri në qershor 2021.
Pra, sipas të dhënave të hetimit, ndërtimi i paligjshëm kishte nisur gjatë kohës kur Kaja drejtonte inspektoratin, ndërsa dy vite më vonë, kur objekti ishte drejt përfundimit, ndërhyrja e autoriteteve çoi në arrestimin e inspektorëve të zonës.
Çështja përfundoi në Gjykatën e Elbasanit, ku Prokuroria kërkoi vlerësimin e ligjshëm të arrestimeve dhe caktimin e masës së sigurisë “detyrim për paraqitje” për të dyshuarit.
Seanca u zhvillua më 5 dhjetor 2021 dhe u shqyrtua nga gjyqtarja Pajtime Fetahu. Ajo vendosi se arrestimi në flagrancë i inspektorëve ishte i paligjshëm, pasi veprimet për të cilat dyshoheshin nuk ishin konstatuar në momentin e kryerjes, por kishin ndodhur më herët.
Megjithatë, gjykata vlerësoi se kishte elementë të dyshimit për veprat penale të ndërtimit të paligjshëm nga ana e ndërtuesit dhe shpërdorimit të detyrës nga ana e inspektorëve. Për këtë arsye, ndaj tyre u caktua masa e sigurisë “detyrim për paraqitje”.
Kështu, Alian Zabeli rikthehet në një pozicion drejtues në një kompani publike, këtë herë në krye të “Eco-Elb”, pas një të kaluare të shënuar nga një procedim penal për shpërdorim detyre, ndërsa ish-drejtuesi i tij, Leli Kaja, ndodhet tashmë në pranga për një tjetër çështje të hetuar nga SPAK.
