Zëvendësministri i Infrastrukturës dhe Energjisë, Erlind Sulo, ka reaguar pas përhapjes në rrjetet sociale të një videoje intime, me të cilën, sipas tij, emri i tij është lidhur në mënyrë të pavërtetë.
Në reagimin e tij publik, Sulo bën të ditur se është informuar prej dy ditësh për qarkullimin e videos, ndërsa në komente dhe postime të ndryshme është pretenduar se njëri prej personave që shfaqen në të është ai, së bashku me një ish-banore të Big Brother.
Zëvendësministri i ka mohuar këto pretendime, duke deklaruar se nuk është personi që shfaqet në pamjet e publikuara. Ai shprehet se nuk do të merrej me thashetheme, por kundërshton përdorimin e emrit të tij në këtë çështje.
Në deklaratën e tij, Sulo përmend Senajda Kelmendin dhe Elton Tozajn, të cilët i akuzon se, përmes publikimeve dhe komenteve në rrjetet sociale, kanë lidhur emrin e tij me videon, duke iu referuar edhe funksionit të tij publik.
Ai thekson se kjo situatë nuk ka sjellë shqetësim vetëm për të personalisht, por edhe për familjen e tij. Për këtë arsye, Sulo bën me dije se ka përgatitur kërkesën për gjykim ndaj dy personave dhe se synon ta ndjekë çështjen përpara gjykatës kompetente.
“Do të ndjek çdo hap ligjor deri në fund”, shprehet ai, duke nënvizuar se liria e shprehjes nuk duhet të përdoret si justifikim për cenimin e dinjitetit dhe reputacionit të individit.
Në përfundim të reagimit, Sulo rithekson se nuk është personi që shfaqet në videon që po qarkullon në rrjetet sociale dhe se nuk ka asgjë për të fshehur apo për të justifikuar. Ai e cilëson këtë çështje si një problem që lidhet me respektimin e dinjitetit njerëzor dhe mbrojtjen e familjes.
