Disa postime që qarkullojnë në rrjetet sociale pretendojnë se pajisje LRAD kanë mbërritur në aeroportin e Rinasit, duke ngritur pikëpyetje mbi përdorimin e mundshëm të teknologjive akustike gjatë protestës studentore kundër qeverisë.
Në postimin e mëposhtëm, pretendohet se bëhet fjalë për pajisje izraelite që “godasin me radiofrekuencë” dhe përmendet përdorimi i tyre i pretenduar gjatë protestave në Beograd.
LRAD (Long Range Acoustic Device) është një pajisje akustike që transmeton mesazhe ose tinguj me intensitet të lartë në distanca të largëta. Ajo nuk është, në vetvete, një pajisje që godet me radiofrekuencë. Përdorimi i tingujve me intensitet të lartë mund të shkaktojë dhimbje, çorientim dhe dëmtime të dëgjimit, veçanërisht në distanca të afërta ose pas ekspozimit të zgjatur.
LRAD u përmend gjerësisht edhe pas protestës së 15 marsit 2025 në Beograd, kur demonstrues raportuan një tingull të pazakontë dhe shqetësime fizike. Autoritetet serbe mohuan përdorimin e një arme zanore. Në shtator 2026, Prokuroria e Lartë në Beograd deklaroi se gjatë protestës nuk ishte përdorur pajisje LRAD ose armë zanore, ndërsa debatet dhe pretendimet rreth incidentit kanë vazhduar.
