Delegacioni i Bashkimit Evropian në Shqipëri ka reaguar zyrtarisht për protestën e studentëve, e cila po zhvillohet për të dytën ditë radhazi përpara Ministrisë së Arsimit në Tiranë, duke shprehur shqetësim për përshkallëzimin e situatës dhe incidentet e dhunshme të raportuara gjatë tubimit.
Në deklaratën e tij, BE-ja thekson se e drejta për të protestuar dhe liria e shprehjes janë parime themelore që duhet të garantohen dhe të respektohen, ndërsa u bën thirrje protestuesve që këto të drejta t’i ushtrojnë në mënyrë paqësore.
Një tjetër pikë e rëndësishme e reagimit lidhet me pretendimet për përdorim të tepruar të forcës nga policia ndaj studentëve protestues dhe gazetarëve. Delegacioni nënvizon se çdo ndërhyrje policore duhet të jetë proporcionale me situatën dhe të mos cenojë të drejtat themelore të qytetarëve.
Po ashtu, Bashkimi Evropian kërkon që rastet e dyshuara të trajtohen me përparësi dhe të hetohen në mënyrë të plotë.
Reagimi i BE-së vjen në një moment tensioni, ndërsa protesta e studentëve vijon përpara Ministrisë së Arsimit, duke vënë në qendër të vëmendjes respektimin e të drejtave të qytetarëve dhe mënyrën se si po menaxhohet situata nga autoritetet.
