Kryeministri dhe kreu i Partisë Socialiste, Edi Rama, do të mbledhë sot në një takim të përbashkët Grupin Parlamentar të PS-së dhe anëtarët e qeverisë.
Takimi do të zhvillohet në orën 10:00 në Pallatin e Brigadave, ndërsa në qendër të diskutimeve pritet të jetë organizimi i socialistëve në terren dhe forcimi i kontaktit me qytetarët.
Një prej pikave të diskutimit pritet të jetë koncepti “Prania Besnike”, një mënyrë e re organizimi që synon një angazhim më të vazhdueshëm të deputetëve, drejtuesve politikë dhe strukturave vendore pranë komuniteteve.
Ideja është që deputetët dhe strukturat e PS-së të jenë më të pranishëm në terren, duke identifikuar problematikat e qytetarëve dhe duke ndjekur më nga afër zgjidhjen e tyre.
Por, përtej organizimit politik, mbledhja e sotme pritet të marrë edhe një peshë tjetër për shkak të mundësisë së ndryshimeve në kabinetin qeveritar.
Rama mund të përdorë takimin me deputetët dhe ministrat për të komunikuar lëvizje të reja në qeveri, në një format që nuk do të ishte i panjohur për socialistët. Edhe në janar të këtij viti, ndryshimet në kabinet u komunikuan pikërisht gjatë një mbledhjeje të përbashkët mes Grupit Parlamentar të PS-së dhe qeverisë.
Nëse ndryshimet konfirmohen, takimi i sotëm mund të shërbejë si momenti i parë i një riorganizimi të ri të ekzekutivit, ndërsa vëmendja do të jetë te ministrat që mund të largohen, emrat që mund t’i zëvendësojnë dhe drejtimi që Rama do t’i japë kabinetit në vijim.
