Ish-zyrtari i Policisë së Shtetit, Uljan Shpataraku, është transferuar në paraburgimin e Peqinit, pasi Gjykata e Posaçme vendosi ndaj tij masën e sigurisë “arrest në burg”.
Shpataraku u arrestua më 26 gusht në zonën e Plepave në Durrës, gjatë operacionit për kapjen e biznesmenit Ergys Agasi, i cili ishte shpallur në kërkim dhe ndodhej prej disa muajsh në arrati. Ish-polici ishte në drejtimin e automjetit ku udhëtonte Agasi.
Sipas SPAK, Shpataraku dyshohet për veprën penale “përkrahja e autorit të krimit”. Prokuroria e Posaçme pretendon se ai ka ndihmuar Agasin gjatë periudhës që ky i fundit i shmangej drejtësisë.
Pas arrestimit, autoritetet ushtruan kontrolle edhe në banesën e Shpatarakut në Tiranë. Gjatë kontrollit u gjetën disa armë zjarri, mes tyre tre pistoleta, dy armë të tipit shotgun dhe dy pushkë.
Sipas të dhënave të raportuara, armët rezultojnë të ishin të pajisura me leje.
Më 29 gusht, GJKKO caktoi ndaj ish-efektivit masën “arrest në burg”. Hetimet e SPAK për të sqaruar rolin e tij në rast dhe lidhjet me personat e tjerë të përfshirë vijojnë.
