Në një konferencë me gazetarët, kryetari i Partisë Demokratike, Sali Berisha, ka hedhur akuza të forta ndaj Prokurorisë, duke deklaruar se ajo disponon materiale filmike dhe audio të regjistruara në zyrën e Ergys Agasit në zonën e Bllokut në Tiranë.
Berisha tha se bëhet fjalë për një zyrë të pajisur me mjete regjistrimi, ku sipas tij, janë filmuar dhe regjistruar persona të ndryshëm që kanë hyrë dhe kanë dalë nga ambientet e saj.
“Ergys Agasi ka disponuar në zonën më qendrore të Tiranës një zyrë, studio apo ta quajmë ç’të doni, më e veçanta në llojin e saj në Shqipëri dhe mbase në Evropë”, deklaroi Berisha.
Sipas kreut të PD-së, në këto ambiente janë paraqitur ministra, drejtorë të përgjithshëm, deputetë, gjyqtarë, prokurorë dhe zyrtarë të lartë të Policisë.
Berisha e cilësoi zyrën si një ambient ku, sipas tij, zhvilloheshin takime me karakter të dyshimtë dhe ku regjistrimet mund të përbëjnë materiale me rëndësi për hetimet.
“Pra, zyra e Agasit në Bllok është zyra e një mafiozi ku përdoreshin të gjitha mjetet për arritjen e qëllimeve”, tha Berisha.
Ai akuzoi më tej Prokurorinë se po selekton personat që dalin në këto materiale dhe se po përjashton nga hetimi zyrtarë të lartë.
“Këto foto, zëra, video, të gjitha i disponon Prokuroria. Ata po fshijnë ministrat, sipas disa burimeve. Ata po fshijnë deputetët, po fshijnë zyrtarët më të lartë”, u shpreh Berisha.
PJESE NGA FJALA
Ergys Agasi ka disponuar në zonën më qendrore të Tiranës, një zyrë, studio apo ta quajmë ç’të doni, më e veçanta në llojin e saj në Shqipëri dhe mbase në Evropë.
Zyra e Ergys Agasit bënte regjistrime në figurë dhe zë, sapo të hapje derën dhe sapo të dilje nga ajo derë.
Maniak. Ishte maniak, se maniakët bëjnë akte që thua ti pse i bëjnë, i bënte ai.
Mirëpo regjistrimet e tij, duhet ta dinë shqiptarët, herë-herë provojnë se ajo zyrë ishte një kuplara e vërtetë në mes të Tiranës.
Në atë zyrë janë paraqitur pa asnjë motiv zyrtar ministra, ministre, drejtorë të përgjithshëm, drejtoresha të përgjithshme, deputetë, deputete.
Janë paraqitur gjykatës, prokurorë, zyrtarë të lartë të policisë, etj, etj.
Pra, zyra e Agasit në Bllok është zyra e një mafiozi ku përdoreshin të gjitha mjetet për arritjen e qëllimeve.
Këto fotot, zërat, videot, të gjitha i disponon prokuroria.
Ata po fshijnë ministrat, sipas disa burimeve.
Ata po fshijnë deputetët, po fshijnë zyrtarët më të lartë.
Por i garantoj se hetimi i tyre nuk do ndalet ndonjëherë.
Nuk ndalet ndonjëherë ai hetim.
