Pas pushimeve të verës, politika shqiptare pritet të rikthehet në një vjeshtë të ngarkuar me debate dhe vendimmarrje të rëndësishme. Sesioni i ri parlamentar do të nisë më 8 shtator, ndërsa në qendër të diskutimeve do të jenë disa prej reformave që pritet të ndikojnë drejtpërdrejt në zgjedhjet e ardhshme vendore.
Në të njëjtën kohë, PS dhe opozita do të përballen me një tjetër sfidë: ndryshimet në Kodin Zgjedhor. Mes pikave që pritet të diskutohen janë mënyra e financimit të partive dhe fushatave, si dhe përdorimi i burimeve dhe strukturave shtetërore gjatë periudhave zgjedhore. Synimi i deklaruar është që ndryshimet të përmbyllen brenda këtij viti.
Pjesë e punës së Kuvendit do të jenë edhe nismat që lidhen me integrimin në Bashkimin Europian dhe përafrimin e ligjeve shqiptare me legjislacionin europian.
Ndërkohë, një tjetër zhvillim i rëndësishëm pritet në Presidencë. Kreu i shtetit duhet të caktojë datën e zgjedhjeve vendore të vitit 2027. Në bazë të afateve ligjore, votimet mund të zhvillohen në një nga katër datat e mundshme: 18 ose 25 prill, apo 2 ose 9 maj.
Përtej axhendës parlamentare, shtatori pritet të jetë i rëndësishëm edhe për vetë Partinë Socialiste. Lëvizjet që do të ndërmarrë Edi Rama pritet të japin sinjalet e para për mënyrën se si mazhoranca do të organizohet në prag të zgjedhjeve lokale të vitit 2027.
Ndërsa opozita kundërshton nisjen e sesionit më 8 shtator, duke këmbëngulur se Kushtetuta përcakton 7 shtatorin si datën e fillimit, debati politik pritet të rikthehet menjëherë në Kuvend pas përfundimit të sezonit veror.
