Nga Boldnews.al
Pas dy episodeve të njëpasnjëshme të helmimit të studentëve të Akadamisë së Sigurisë, kompania furnizuese me ushqim, “Sori-Al” ka ndryshuar strukturën e pronësisë.
Alma Tafani, pronarja jetëgjatë e subjektit që shpërndan prodhime ushqimore catering, njëkohësisht bashkëshortja e ish-Kreut të Dhomës së Tregisë së Tiranës, Nikolin Jaka, ka vendosur të shesë aksionet e shoqërisë për një shumë prej më shumë se 2 milionë euro.
Kontrata e shitjes është nënshkruar në 29 qershor 2026, pak pasi Autoriteti Kombëtar i Ushqimit (AKU), nën drejtimin e ish-deputetes socialiste, Blerina Gjylameti, deklaroi pastërtinë e ushqimit të konsumuar nga 60 studentët e Akademisë, të cilët u paraqitën në qendrën e Urgjencës me shenja helmimi.
Ndërkohë, Prokuroria e Tiranës ende nuk e ka thënë fjalën e saj për hetimet e nisura për dy ngjarjet identike, të ndodhura e para në Maj dhe e dyta në qershor të këtij viti.
Burime nga institucioni i Akuzës së kryeqytetit thonë se janë ende duke u kryer veprimet proceduriale për të kuptuar më mirë se cili ishte shkaku i helmimit dhe burimi i tij.
Pasi kompania “Sori-Al” mohoi publikisht që të jetë shkaktare e dy episodeve në Akademinë e Sigurisë, ortakja e vetme, Alma Tafani vendosi të shesë të gjithë aksionet. Sipas kontratës me kusht, të lexuar nga “Boldnews.al”, shuma prej më shumë se 2 milionë euro do të paguhet në tre këste, brenda tre vitesh.
Blerësi merr përsipër që të paguajë për çdo vit nga 678 mijë euro. Por, kush është blerësi?
Pronari i ri i “Sori-Al” shpk është Ramazan Troka, një emër që shfaqet shpesh në transaksione me Alma Tafanin dhe Nikolin Jakën.
Troka, “blerësi i përhershëm”
Ramazan Troka është një personazh që, për disa “rastësi interesante”, shfaqet pranë çiftit të biznesmenëve Jaka-Tafani, sa herë që kompanitë e e lidhura me ta kanë probleme me imazhin.
Në vitin 1997, Nikolin Jaka dhe një bashkëpunëtor i tij, krijojnë kompaninë “KPL” (fillimisht me emrat “SO.RI” dhe më tej “Avancia” shpk), me aktivitet në fushën e shpërndarjes së ushqimeve (catering) për spitale e ristorante.
Në mars të vitit 2007, Alma Tafani bëhet ortake e vetme e shoqërisë. Vetëm pak muaj më pas, në nëntor të atij viti, Tafani i shet të gjithë aksionet e kompanisë “KPL” tek Ramazan Troka.
Gjatë kohës që “KPL” shpk ishte zyrtarisht në pronësi të Ramazan Trokës, emri i kompanisë u përfshi në disa aludime për tendera të favorizuar, sidomos tek ato të zhvilluara nga Qendra Spitalore Universitare “Nënë Tereza”, Tiranë (QSUT). Pikëpyetjet publike u ngritën, sidomos në periudhën 2022-2024.
Pasi u shua disi zhurma e këtyre dyshimeve, kompania “Sori-Al”, në pronësi të Alma Tafanit, blen sërish aksionet e shoqërisë “KPL”. Transaksioni u krye në vitin 2025 dhe Ramazan Troka deklaroi në kontratë se i kishte shitur të gjithë aksionet e tij për shumën 45 milionë lekë të reja.
Më tej, subjekti “Sori-Al” e Alma Tafanit i kalon të gjithë aksionet tek individi Alma Tafani, e cila rezulton ende pronare e vetme e “KPL” shpk.
Ndërkohë, kompania kryesore e Tafanit, “Sori-Al”, është krijuar në vitin 2003, me objekt të aktivitetit të saj “ofrimin e shërbimit të furnizimit me ushqim…”. Tafani ka qenë thuajse gjatë të gjithë kohës aksionere e vetme e “Sori-Al”.
Përjashtim bën vetëm një periudhë, gati një-vjeçare, mes viteve 2019-2020, në të cilën pronare e “Sori-Al” u bë nëna e saj, Nife Tafani.
Në dhjetor 2020, Alma Tafani rikthehet pronare e “Sori-Al”, deri pak ditë më parë, kur u përfshi në vorbullën publike që shoqëroi dy incidentet me helmimin e studentëve të Akademisë së Sigurisë.
Pasi kaloi “stuhinë” fillestare, me ndihmën edhe të Autoritetit Kombëtar të Ushqimit, Alma Tafani ka vendosur të shkëpusë, të paktën përkohësisht, lidhjet e saj me “Sori-Al”.
Për këtë, është gjetur sërish “blerësi i përhershëm”, Ramazan Troka. Ai mori përsipër që të paguajë për 36 muaj shumën 2 milionë euro.
Troka është regjistruar tashmë si pronar i “Sori-Al”. Por, ai do të shënohet si pronar përfundimtar vetëm nëse plotëson kushtetin që, brenda tre vitesh, të paguajë këstet e detyrimit financiar.
Në rast se Ramazan Troka nuk i paguan në kohë, atëherë kompania i rikthehet sërish pronares së mëparshme, Alma Tafani. Deri atëherë, ndoshta është harruar historia e helmimit të studentëve të Akademisë së Sigurisë.
