Shqipëria pritet të përballet me stuhi të shkurtra, por me intensitet të lartë gjatë ditës së premte. Paralajmërimi është bërë nga meteorologia Tanja Porja, e cila ka dhënë detaje mbi zhvillimin e kushteve atmosferike në ditët në vijim.
Sipas saj, fenomenet e motit do të shtrihen në pjesën më të madhe të territorit, ndërsa zonat qendrore dhe juglindore paraqiten më të ekspozuara ndaj reshjeve të dendura dhe erërave të forta.
Porja shpjegoi se bëhet fjalë për formacione të izoluara stuhish, të cilat mund të krijohen papritur mbi zona të caktuara dhe të sjellin për një kohë të shkurtër sasi të mëdha reshjesh.
Ndër zonat që mund të preken më shumë janë Tirana, Durrësi, Fushë-Kruja, Elbasani, Librazhdi, Pogradeci, Korça, Erseka, Devolli, si edhe disa zona të jugut si Përmeti dhe Gjirokastra.
Meteorologia theksoi se, megjithëse këto stuhi do të zgjasin pak, në harkun kohor prej rreth 20-40 minutash mund të shoqërohen me reshje intensive dhe shpejtësi të larta të erës.
Sipas parashikimit, rreziku do të jetë i pranishëm në të gjithë territorin, pasi këto lloj stuhish janë të vështira për t’u lokalizuar me saktësi paraprakisht.
