Një aksident i rëndë rrugor ka shkaktuar dy viktima mbrëmjen e sotme në fshatin Qyrkan, në Njësinë Administrative Gostime të Bashkisë Cërrik.
Sipas informacioneve paraprake, dy automjete janë përplasur fuqishëm me njëra-tjetrën, në një aksident “kokë më kokë”. Përplasja ka qenë me impakt të fortë, duke shkaktuar dëmtime të mëdha në të dy mjetet, ndërsa njëri prej tyre ka dalë nga rruga.
Dy persona kanë ndërruar jetë në vendin e ngjarjes, ndërsa identiteti i tyre ende nuk është bërë publik.
Në zonë kanë mbërritur menjëherë forcat e policisë, ekipet e emergjencës dhe grupi hetimor, të cilët kanë nisur verifikimet për zbardhjen e shkaqeve dhe dinamikës së aksidentit.
Nga të dhënat paraprake dyshohet se përplasja mund të ketë ardhur si pasojë e humbjes së kontrollit mbi automjetet ose një manovre të gabuar, por pritet që hetimet të përcaktojnë rrethanat e plota të ngjarjes.
