Nga Kim Mehmeti
Jo vetëm tani, por gjithmonë, Shqipëria do të mburret me të rinjtë që sot protestojnë në Tiranë dhe do të turpërohet nga ata që duan ta heshtin dhe ta komprometojnë zërin e sinqertë rinor, i cili mëmëdheut ia freskon damarët e shpresës dhe krenarisë.
Këto protesta janë investimi i vetëm që i garanton Shqipërisë një të ardhme të sigurt dhe dalje nga përbuzja që ia bënë burrështetasit që nuk ndërtonin, por rrënonin shtet.
Dhe pas këtyre protestave rinore në Tiranë – si pas të gjitha ngjarjeve që ndajnë epokat mes tyre – do të ketë nga ata që do të mburren me to dhe nga ata që do ta arsyetojnë jargavitjen ndaj Piktorit, i cili i ushqente ata begatshëm që të mund të jargaviteshin sa më shumë.
Andaj këta të rinj, që i thanë mjaft përbuzjes që as armiqtë nuk kanë mundur t’ia bëjnë shqiptarisë, do të jenë ata para të cilëve do të turpërohemi ne që u jargaviteshim burrështetasve të cilët nuk ndërtuan, por rrënuan shtet.
Këta të rinj duhet të përkrahen dhe të mbrohen nga “lehjet” e Piktorit dhe nga kafshimet e hienave mediatike të “Rilindjes”, të cilat e mbrojnë Shqipërinë e hajdutëve dhe kriminelëve, ngaqë e dinë se, posa mëmëdheu t’u kthehet shqiptarëve, ata do të mbeten pa grazhdin e krimit që i ushqen.
