Atmosfera e Kupës së Botës 2026 është ndezur jo vetëm në fushë, por edhe jashtë saj.
Në prag të sfidës së parë të Grupit J mes Argjentinës dhe Algjerisë, tifozët e dy përfaqësueseve janë përfshirë në përleshje fizike në zemër të New York-ut.
Përplasja ndodhi në Times Square, ku qindra mbështetës të dy skuadrave ishin mbledhur për të festuar dhe për të krijuar atmosferë para ndeshjes.
Situata doli jashtë kontrollit kur mes disa tifozëve shpërthyen tensione, që më pas u kthyen në përleshje fizike, duke shkaktuar panik mes të pranishmëve. Sipas pamjeve të publikuara në rrjetet sociale, në zonë ndodheshin edhe gra dhe fëmijë.
Incidenti i shtohet rasteve të tjera të përplasjeve mes tifozëve që janë regjistruar gjatë ditëve të para të Botërorit, duke ngritur shqetësime për sigurinë gjatë turneut.
Ndërkohë, vëmendja sportive mbetet te dueli Argjentinë–Algjeri, që do të luhet në orët e para të së mërkurës. Për kampionët e botës, kjo sfidë ka një rëndësi të veçantë, pasi Lionel Messi pritet të regjistrojë paraqitjen e tij të 200-të me fanellën e kombëtares.
Pas triumfit historik në Botërorin e Katarit, kapiteni argjentinas synon të nisë me fitore një tjetër aventurë botërore, ndërsa Algjeria shpreson të surprizojë një nga favoritët kryesorë të turneut.
