Antimafia italiane në Breshia ka përmbyllur hetimet paraprake ndaj një organizate të dyshuar transnacionale të trafikimit të drogës.
Hetimi, i koordinuar nga Zëvendësprokurorja Roberta Panico, zbuloi një rrjet të dendur trafiku narkotikësh, që përfshin Shqipërinë dhe disa provinca italiane, përfshirë Lecce-n, ku grupi mund të ishte mbështetur në baza logjistike dhe figura të besueshme për të shpërndarë kokainën, raportojnë mediat italiane.
Në zemër të lidhjes së Salentos janë emrat e Altin Shehaj, një 44-vjeçari shqiptar që jetonte në Alliste, dhe Fabio Perdicchia, një 56-vjeçar nga Melissano. Sipas prokurorisë, i pari mbante një rol të lartë në menaxhimin e “bazës së Leçes”, duke mbikëqyrur blerjen e sasive të mëdha të drogës së furnizuar nga banda dhe shpërndarjen e tyre të mëvonshme në të gjithë zonën.
Akuzat kundër Perdicchia-s, një punonjës i një kompanie transporti, kanë të bëjnë me rolin e tij të dyshuar si korrier i specializuar. Ai akuzohet për kryerjen e disa dërgesave të shumave të mëdha parash, përfshirë 600,000 euro, të lidhura me blerjet e mëparshme të drogës së ruajtur në Racale midis viteve 2019 dhe 2020.
Vincenzo Bruno, me origjinë nga Brindisi, është i listuar në disa akuza si marrësi përfundimtar i dërgesave me kokainë në total 137 kilogramë që mbërritën në kryeqytetin e Salentos midis nëntorit 2020 dhe janarit 2021. Megjithatë, dokumenti i Prokurorisë së Brescias, sqaron se pozicioni i tij është aktualisht objekt i një procedure të veçantë.
