Një funksionar i lartë i Tatimeve të Tiranës ka rënë në rrjetën e Prokurisë së Posaçme si person kyç në skemën e pastrimit të parave që gjeneronte korrupsioni i përbindshëm në AKSHI.
Aurel Cenolli me detyrë drejtor kontrolli në Drejtorinë e Tatimeve të Tiranës, rezulton se ndihmonte biznesmenin Andis Papa të pastronte paratë e korrupsionit duke lëshuar 10 milionë euro fatura fiktive për blerje çokollatash dhe biskotash tek kompania Mega Distribution e Bedri dhe Rogert Rrytas.
Roli i Cenollit në skemën e pastrimit të parave ka dalë nga dëshmia e një kontabilisteje të quajtur Arlinda Meko, e cila ka legalizuar transaksionet fiktive.
Sipas dëshmisë të publikuar nga Weblajm, Meko ka dëshmuar në SPAK se kalimi i faturave i është kërkuar nga Andis Papa, Ermal Beqiri dhe Aurel Cenolli.
Pjesë nga dëshmia e Mekos në SPAK
Nga Procesverbali datë 19.01.2025 për marrjen e të dhënave nga personi që ka dijeni për veprën penale rezulton se Znj. Arlinda Meko ka deklaruar ndër të tjera se ka punuar me mbajtjen e kontabilitetit të shoqërisë Megadistribution sh.p.k., duke treguar se ka dijeni për faturimet ndërmjet kompanisë Megadistribution sh.p.k. me Fastech sh.p.k. dhe Soft & Solution sh.p.k., duke shpjeguar se Z. Andis Papa ka ardhur në zyrën e saj me Z. Aurel Cenolli (Drejtor në Drejtorinë e Tatimeve Rajonale Tiranë) dhe se i kanë kërkuar të bëjnë blerje të produkteve të kompanisë Megadistribution sh.p.k. dhe se blerjet nuk do të bëheshin me shkëmbim malli por faturime të Megadistribution sh.p.k. tek shoqëria Fastech sh.p.k.
Ajo sqaron se interesi i Fastech sh.p.k. ishte që përmes këtyre blerjeve të rritej niveli i shpenzimeve të kompanisë me qëllim që fitimet që merrte kjo kompani nga aktiviteti i saj të tatoheshin sa më apk nëpërmjet rritjes së shpenzimeve dhe se nga ana tjetër Megadistribution sh.p.k. kishte interes se shitjet pa faturë në treg do të mbuloheshin nga shitjet e këtyre faturave fiskale dhe se në këtë mënyrë do të balancohej me importet e subjektit. Ajo sqaron se kjo u diskutua ndërmjet Z. Bedri Rryta dhe Z. Andis Papa.
Nga Procesverbali datë 20.01.2025 mbi deklarimet e personit ndaj të cilës zhvillohet hetimet, me prezencën e mbrojtësit, Znj. Arlinda Meko ka deklaruar se nuk i kujtohet nuk ka ardhur në zyrë Znj. Arjola Koromani dhe se faturat ishin prerë në emër të shoqërisë Soft & Solution dhe se mendon se emrin e këtij subjekti ia ka dhënë Z. Andis Papa, duke treguar se ka patur edhe debate për mënyrën e deklarimit të disa faturave me Znj. Koromani.
Znj. Meko tregon më tej se Z. Ermal Beqiri dhe Z. Andis Papa kanë takuar më tej Z. Bedri Rryta dhe se ka qenë edhe ajo prezent, pasi e ka kërkuar ky i fundit. Ajo shpjegon se ato i ishin ankuar Z. Bedri Rryta se nuk donin të punonin me Znj. Meko dhe se kërkonin të punonin drejtpërdrejtë me Z. Rryta.
As ky i fundit dhe as Znj. Meko, tregon ajo, nuk kanë marrë ndonjë herë përfitime nga ato. Z. Rryta, tregon ajo, i ka thënë më pas se do të punonte vetëm me Z. Andis Papa dhe se me Z. Ermal Beqiri nuk donte ta shihte fare. /Kapitali.al
