Ardit Kraja, emër i njohur në botën e basteve sportive, rezulton sërish në qendër të akuzave për organizim të aktivitetit të paligjshëm të bixhozit.
Sipas denoncimeve të mbërritura pranë redaksisë së Timoni.al, Kraja dyshohet se vazhdon të ushtrojë aktivitet të paligjshëm të basteve sportive në Tiranë, në disa ambiente me emrin “Dua Kafe”, ku pretendohet se qarkullojnë miliona euro jashtë çdo kontrolli fiskal dhe ligjor.
Denoncuesit ngrenë pikëpyetje të forta mbi faktin se si ky aktivitet vazhdon të funksionojë lirshëm, ndërkohë që Policia e Shtetit nuk ka ndërmarrë asnjë aksion konkret për goditjen e tij.
Ndërkohë, emri i Ardit Krajës është rikthyer fuqishëm edhe në mediat e Kosovës. Ai është arrestuar nga Policia e Kosovës, pasi rezultonte i kërkuar nga dy gjykata, ajo e Prizrenit dhe e Mitrovicës, për çështje që lidhen me organizimin e bixhozit ilegal.
Në Shqipëri, Ardit Kraja njihet si pronar i disa kompanive në sektorin e basteve sportive, ndërtimit dhe investimeve. Për vite me radhë ai është konsideruar si një nga figurat më të fuqishme të industrisë së basteve online.
Po ashtu, biznesmeni shqiptar ka qenë objekt hetimi edhe nga Prokuroria Speciale e Republikës së Kosovës. Në aktakuzën ndaj disa personave të përfshirë në skema të dyshuara të bixhozit ilegal, autoritetet kosovare theksonin se të akuzuarit kishin qenë më herët punonjës të Ardit Krajës dhe se aktiviteti kishte vijuar edhe pas ndalimit të lojërave të fatit në Kosovë.
“…të akuzuarit në këtë rast dikur kanë punuar për bastoret e shtetasit të Shqipërisë, Ardit Kraja, dhe pas muajit prill 2019 kur në Kosovë bixhozi u ndalua, thjesht kanë vazhduar me të njëjtin aktivitet”, thuhet në aktakuzën e autoriteteve kosovare.
Tashmë mbetet për t’u parë nëse institucionet shqiptare do të reagojnë ndaj këtyre denoncimeve dhe nëse Prokuroria apo policia do të ushtrojnë kontrolle për aktivitetin që pretendohet se zhvillohet në ambientet “Dua Kafe” në Tiranë.
