Duke marrë shkas nga zjarri i rënë së fundmi në një pallat pranë ‘ farmacisë 10’ në Tiranë, anëtari i Këshillit Bashkiak, Ilir Alimehmeti, ka lëshuar akuza ndaj qeverisë për keqmenaxhimin dhe prioritetet e gabuara të saj.
Në një intervistë për SYRI TV, Alimehmeti deklaroi se ndërsa shteti është i paaftë të ofrojë mjetet bazë për shërbimet emergjente, ai është i armatosur deri në dhëmbë për të shtypur protestat qytetare.
Alimehmeti i cilësoi zjarrfikësit si ‘heronj’ për vetëmohimin e tyre, duke theksuar se ata u përballën me flakët pa pajisje mbrojtëse elementare si maska kundër tymrave toksikë. Ai zbuloi detaje tronditëse rreth paaftësisë logjistike, ku mjeti zjarrfikës i Tiranës arrinte vetëm deri në katin e pestë të ndërtesës, duke e bërë të nevojshme ndërhyrjen e një mjeti nga Kamza që mund të arrinte katin e tetë.
‘Përdorimi i helikopterëve për të shuar zjarrin në një pallat nuk është kurrë zgjidhja e duhur, por ishte e vetmja alternativë e mbetur. Kjo situatë ekspozoi qartë gjendjen reale ku ndodhemi’, theksoi ai.
Ai vuri në dukje se ndërsa zjarrfikësve u mungojnë mjetet themelore për të shpëtuar jetë, policia është e pajisur me teknologjinë më të fundit për menaxhimin e turmave.
