Deputeti i Partisë Demokratike, Saimir Korreshi, ka reaguar me tone të forta dhe ironi gjatë seancës plenare të kësaj të enjteje, duke hedhur akuza ndaj ministres së Shëndetësisë, Evis Sala, për mungesën e saj në Kuvend.
Nga foltorja, Korreshi ngriti shqetësimin për mungesën e llogaridhënies nga ana e ministres, duke ironizuar situatën dhe duke sugjeruar se ajo “duhet shpallur e humbur”, për shkak të mungesës në seancë dhe, sipas tij, mungesës së informacionit mbi realitetin në terren.
Ai vuri në pikëpyetje nëse ministrja është në dijeni të detyrës që mban dhe të problematikave që përballen qytetarët në sistemin shëndetësor, duke theksuar se sëmundja nuk pret dhe se institucionet duhet të jenë funksionale në çdo moment.
Gjatë fjalës së tij, deputeti demokrat solli në vëmendje edhe vështirësitë konkrete që, sipas tij, hasen në spitale, duke përmendur mungesën e mjekëve specialistë, si dhe mungesa bazike në pajisje dhe materiale mjekësore.
Ai ngriti shqetësimin për vonesat në marrjen e shërbimit urgjent dhe për mënyrën e organizimit të sistemit, që sipas tij, krijon pengesa për qytetarët.
Korreshi u ndal gjithashtu edhe te çështja e çmimeve të ilaçeve, duke pretenduar se ato janë rritur dhe se kjo situatë rëndon mbi pacientët.
Korreshi: E para njëherë a është mirë ajo? Duhet pyetur nga shëndeti. A është mirë se kemi bërë merak? E di ajo që është ministre apo nuk e di? Nuk mund të braktiste kuvendi kështu. Nuk pret sëmundja si thotë ajo në fund të vitit. Nuk pret. Dhe po që se nuk e dini ku është ta shpallim njerëz të humbur. Ilaçet nuk e dinte që ishin shtrenjtuar.
Ça bën kjo ministrja e shëndetësisë? Për të marrë sot urgjencë mi bie 127 të lidh me Tiranën pastaj kismet të marri atë të Lushnjes. Nuk doja të provoja me njerëzit e shtëpisë se ç’është shëndetësia. Thojini asaj çfarë ndodh te spitalet shqiptare se nuk e di. Të rrijë 1 orë e gjys një pacient se nuk ka kardiolog. Nuk ka as pambuk në Lushnje, as dorashka. Kush mban përgjegjësi? Zhvendoset spitali dhe nuk del leja e ndërtimit. Si i trajtojmë njerëzit si stallë derrash? Njoftojeni të paktën për rrogën që i ka kaluar?
