Një tërmet i fortë me magnitudë 7.4 ballë goditi brigjet e Indonesisë lindore mëngjesin e së enjtes, duke shkaktuar panik te banorët, dëme materiale dhe humbjen e jetës së një personi.
Lëkundja sizmike u regjistrua në Detin Moluccas, në një thellësi prej rreth 35 kilometrash, sipas United States Geological Survey. Pas tërmetit, autoritetet lëshuan një paralajmërim për cunami, pasi u raportuan valë deri në 75 centimetra në disa zona, por alarmi u hoq më vonë.
Në qytetin Manado, banorët dolën me vrap nga shtëpitë dhe ndërtesat në panik. Një grua 58-vjeçare, Siti Rohayati, rrëfeu momentet e frikshme kur tërmeti goditi gjatë mëngjesit.
“Nuk dija çfarë të bëja. Po përpiqesha vetëm të shpëtoja familjen time”, tha ajo, duke shtuar se prioriteti i saj ishte siguria e fëmijëve.
Sipas autoriteteve të kërkim-shpëtimit, një person humbi jetën pasi një ndërtesë u shemb në Manado, ndërsa një tjetër mbeti i plagosur. Ekipet emergjente janë në terren dhe po verifikojnë raportet për të lënduar të tjerë.
Pas tërmetit kryesor, zona u godit nga dhjetëra lëkundje pasuese, njëra prej të cilave arriti magnitudën 5.9 ballë. Autoritetet në Jakarta konfirmuan se aktiviteti sizmik mbetet i lartë.
Qendra e Paralajmërimit për Cunami në Paqësor paralajmëroi fillimisht për rrezik valësh të rrezikshme deri në 1,000 kilometra nga epiqendra, duke përfshirë brigjet e Indonezisë, Filipineve dhe Malajzisë.
