Prokuroria e Tiranës ka hapur hetime ndaj kompanisë farmaceutike Rejsi Farma për dyshime për përfitime abuzive përmes skemës së rimbursimit të barnave dhe për vendosjen në treg të medikamenteve të skaduara.
Sipas Drejtorisë së Hetimit Tatimor, një raport i Kontrollit të Lartë të Shtetit mbi Fondin e Sigurimit të Detyrueshëm të Kujdesit Shëndetësor ka nxjerrë në pah shkelje në procesin e rimbursimit të barnave. Raporti tregon se 18 lloje medikamentesh, me sasi totale 12,178 copë dhe vlerë mbi 41 milion lekë, rezultojnë të skaduara prej më shumë se një viti, pa dokumentacion të vlefshëm ose proces-verbal nga autoritetet kompetente, si dhe pa miratimin e Agjencisë Kombëtare të Barnave dhe Pajisjeve Mjekësore.
Kontrolli ka evidentuar gjithashtu dyshime për përfitime të paligjshme nga skema e barnave të rimbursueshme, duke mos i hequr ato jashtë përdorimit dhe duke rrezikuar sigurinë e qytetarëve që i përdorin. Mungesa e dokumentacionit dhe e procedurave të rregullta shkakton një pasqyrë të pasaktë të inventarit dhe mund të lejojë rifutjen në qarkullim të barnave të skaduara, me pasoja për shëndetin e pacientëve.
Prokuroria ka nisur hetimet mbi mashtrimet e mundshme të Fondit të Sigurimit të Detyrueshëm nga Rejsi Farma, përfshirë paraqitjen e të dhënave jo të sakta mbi barnat e skaduara. Burime të sigurta të Top Channel konfirmojnë se dosja po ndiqet nga prokurori Ndini Tavani.
