Sekretari i Përgjithshëm i PD-së, Flamur Noka është përfshirë në një përplasje verbale me deputetin socialist, Ardit Bido, gjatë seancës plenare të mbajtur këtë të enjte në Kuvend.
Ishte Noka ai i cili u shpreh fillimisht se kur ishte në pushtet në PD, Ardit Bidon, herë ja sillte në zyrë Shpëtim Idrizi si çam dhe herë, Vangjel Dule si grek, duke theksuar se as nuk di se çfarë është ky i fundit.
“Kur ishim ne në pushtet, Bidon njëherë ma sillte Shpëtim Idrizi si çam, njëherë ma sillte Vangjel Dule si grek, herë ma sillnin si lab dhe kur më thanë që është këtu kam thënë, ore ca është ky njeri (Ardit Bido) se nuk e di. E kuptoni çfarë i keni bërë këtij Parlamenti. ”,- tha Noka.
Ndërkohë në përgjigje Bido përgënjeshtroi deklaratën e Nokës, duke thënë se nuk e ka takuar kurrë Vangjel Dulen. Ai shtoi, se është takuar një herë me Flamur Nokën, në zyrën e tij, vite më parë, kur ka shkuar si gazetar për ta marrë në intervistë.
“Replika ishte ndaj zotit Noka. Ai gënjeu. Kam qenë një herë te zoti Noka për ta marrë në intervistë. Skam qenë asnjëherë me politikanë. Madje i prish punë dhe zotit Dule, se nuk e kam takuar kurrë. Ka qenë në vitet kur PD ishte në pushtet, ku të gjithë duhej të shkonin në zyrën e tij dhe të bëheshin drejtorë. Më pas bëheshe me prona dhe apartamente. Kuksianët e tij dilnin zot me prona në Sarandë. Politika nuk bëhet me kalqe.”, tha Bido.
Dy deklaratat e ligjvënësve bien ndesh me njëra tjetrën, ndërsa nuk dihet se cili prej tyre po mashtron.
