Shkarkohet nga detyra Drejtori i Përgjithshëm i Policisë së Shtetit, Ilir Proda, duke konfirmuar paralajmërimin e publikuar më 1 shkurt nga Maska.al, ku citohej se largimi i tij ishte çështje ditësh.
Burime bëjnë të ditur se në krye të Policisë së Shtetit është komanduar Sokol Bizhga, i cili do të marrë drejtimin e institucionit në këtë fazë tranzitore.
Po ashtu, sipas burimeve mediatike, nga detyra është shkarkuar edhe drejtori i Policisë së Tiranës, Elton Alushi, megjithëse ende nuk është bërë publik emri i zëvendësuesit të tij.
Çfarë paralajmëroi Maska.al?
Në publikimin e 1 shkurtit, Maska.al raportonte, duke iu referuar burimeve jozyrtare, se Ilir Proda pritej të shkarkohej nga detyra në ditët në vijim. Sipas atyre burimeve, largimi i tij mund të shoqërohej me tensione të forta institucionale dhe me mundësinë e nisjes së hetimeve nga SPAK.
Deri në këtë moment nuk ka një konfirmim zyrtar për ndonjë hetim ndaj Prodës, ndërsa autoritetet nuk kanë dhënë detaje mbi arsyet konkrete të shkarkimit.
