Një shtyllë e tensionit të lartë 110 kV, nr. 15, që lidh HEC Egnatia me nënstacionin e Librazhd është zhvendosur këtë të diel si pasojë e shembjes së rrugës dhe masivit të dherave.
Sipas informacioneve, situata përbën rrezik për sigurinë e linjës së transmetimit në zonë, ndërsa punonjësit e OST kanë shkuar në vendngjarje dhe po diskutojnë një zgjidhje që përfshin përforcimin e bazamentit të shtyllës si dhe stabilizimin e trupit të saj përmes lidhjes me kabuj çeliku.
Aktualisht linja po mbahet nën kontroll, ndërsa raportohet se paralelisht, gjeologët po bëjnë vlerësimin teknik të terrenit për të përcaktuar shkakun e zhvendosjes dhe rrezikun potencial për përkeqësim të mëtejshëm.
