Mario Çela, vëllai i Suel Çelës, u ekstradua pak ditë më parë nga Belgjika drejt Shqipërisë, në kuadër të operacionit policor të koduar “The Wanted”.
Pas mbërritjes, ai është paraqitur në Qendrën Spitalore të burgjeve, duke sjellë me vete një epikrizë mjekësore, dhe ka kërkuar zëvendësim të masës së sigurisë për arsye shëndetësore.
Çela ishte shpallur në kërkim ndërkombëtar pasi Gjykata e Posaçme për Korrupsionin dhe Krimin e Organizuar (GJKKO) i kishte caktuar masën e sigurisë “Arrest në burg” për disa vepra penale të rënda.
Ai akuzohet për “Vrasje me paramendim”, “Organizata kriminale”, “Mbajtja pa leje dhe prodhimi i armëve, armëve shpërthyese dhe municionit” si dhe “Korrupsioni aktiv në sektorin privat”.
Policia e Shtetit njoftoi se ekstradimi u finalizua falë bashkëpunimit mes Interpol Tiranës dhe homologëve belgë, në kuadër të fazës së radhës të operacionit ndërkombëtar “The Wanted”.
Çela, 37 vjeç, lindur në Elbasan, tashmë ndodhet në Shqipëri ku pritet të përballet me drejtësinë për akuzat e ngritura ndaj tij
