Në një shtet normal, personat e përfshirë në skema mashtrimi me barna, tendera të dyshimtë dhe hetime për pastrim parash do të ishin nën hetim intensiv. Në Shqipëri, ata vazhdojnë të fitojnë tendera publikë.
Në qendër të skemës që po ngre pikëpyetje të forta është drejtoresha e Operatorit të Blerjeve të Përqendruara, Arlinda Pogaj — institucioni që sot kontrollon miliarda lekë prokurime për gjithë administratën.
160 mijë euro për kompaninë e Nadir Çaushollit
Me firmën e saj është miratuar një tender me vlerë 160 mijë euro për kompaninë Albadent Group shpk, e lidhur me Nadir Çaushollin, i dënuar më parë për skema mashtrimi me rimbursimin e ilaçeve.
Tenderi ka si objekt blerje materialesh mjekësore për Spitalin e Korçës.
Kujtojmë se më 4 nëntor 2025, Prokuroria e Tiranës arrestoi ish-kreun e FSDKSH, Spartak Zekja, në kuadër të një skeme mashtrimi me rimbursimin e barnave, ku përmendej edhe kompania CFO Pharma e Çaushollit. Megjithatë, ndërkohë që zyrtarë u arrestuan, Çausholli nuk u përfshi në të njëjtën masë penale.
A ishte kjo një çështje që duhej hetuar nga SPAK si grup i strukturuar kriminal? Kjo mbetet një pyetje e hapur.
1.4 milionë euro për Mektrin Motors
Pak ditë më parë, Pogaj ka firmosur një tjetër tender, këtë herë me vlerë 1.4 milionë euro për kompaninë Mektrin Motors, në pronësi të Edmond (Mond) Shahinit, për blerje autoambulancash për QKUM.
Burime pranë procedurës bëjnë me dije se në garë kanë qenë edhe kompani me oferta dukshëm më të ulëta, por fituese është shpallur Mektrin Motors.
Në media është raportuar se Shahini ka qenë subjekt hetimi në Itali në vitin 2008 për çështje që lidhen me trafik droge dhe kontrabandë automjetesh. Ai konsiderohet një nga emrat më të mëdhenj në tregun e makinave luksoze në Shqipëri.
Raportime të ndryshme kanë ngritur dyshime për praktika të shitjes së automjeteve me çmime të deklaruara më të ulëta se vlera reale, ndërsa diferencat dyshohet të paguhen cash — një skemë tipike e përmendur në kontekstin e pastrimit të parave.
Tenderat me “flamur të kuq”
Dy tendera. Dy emra të kontestuar. Një firmë.
Operatori i Blerjeve të Përqendruara është sot institucioni më i fuqishëm në sistemin e prokurimeve. Çdo firmë e drejtoreshës ka efekt domino në miliona euro para publike.
Në vend që të shohim transparencë maksimale dhe garë të hapur, shohim dyshime për paracaktim, favorizim dhe lidhje të errëta.
Pyetja nuk është më nëse ka problem.
Pyetja është: kush mban përgjegjësi?
