Partia Demokratike dhe Policia e Shtetit kanë dalë me dy deklarata ta ndryshme, në lidhje me protestën e mbajtur këtë pasdite te kryeministria dhe revoltën që kjo e fundit shkaktoi.
Policia në një deklaratë zyrtare u shpreh se si pasojë e molotovëve të hedhur gjatë protestës, 16 efektivë kanë pësuar djegie dhe janë transportuar në Spitalin e Traumës.
“Si pasojë e sulmeve drejt Policisë u dëmtuan 16 punonjës Policie, të cilët janë transportuar në spital për ndihmë mjekësore, pasi kanë pësuar djegie dhe dëmtime fizike”,– thuhet në njoftimin e Policisë.
Ndërkohë Partia Demokratike ka hedhur poshtë deklaratën duke thënë se asnjë efektiv policie nuk ndodhet në Spitalin e Traumës.
Në reagimin zyrtar, PD pretendon se te Trauma, aty ku vijon të jetë i shtruar deputeti demokrat Bledjon Nallbati i cili u dhunua nga Policia, nuk është konsatuar asnjë punonjës policie i shtruar në spital.
Sipas PD-së kjo është një tjetër përpjekje e Policisë për manipulim të opinionit publik.
“Policia i shton dhunës së ashpër ndaj qytetarëve dhe përfaqësuesve të opozitës, përfshirë edhe deputetë, mashtrimin e radhës me qëllim manipulimin e opinionit publik.
Zyrat e propagandës së narkopolicisë së gazit dhe të dhunës, thonë se 16 policë janë plagosur, si pasojë e dhunës në protestë. E vërteta është krejt ndryshe. Në urgjencën e Spitalit të Traumës, ku gjendet i plagosur dhe nën kujdes mjekësor, deputeti demokrat Bledjon Nallbati nuk ka asnjë oficer policie.
Sipas raportimeve në rrugë operative, në këtë Urgjencë janë paraqitur pesë oficerë policie të cilët janë përcjellë nga personeli, duke qenë se nuk kanë pasur as plagë dhe as shqetësime që kërkojnë trajtim mjekësor.
Burime nga Spitali i Traumës, bëjnë me dije se paraqitja e tyre është bërë me urdhër të narko-komisarëve të Policisë me qëllim manipulimin e opinionit publik dhe për të mbuluar dhunuesit dhe të dhunuarit e vërtetë të protestës së sotme.
Nga pamjet e shpërndara në media dhe në rrjete sociale shihen qartë se kush janë ushtruesit e dhunës dhe kush e ka pësuar dhunën”,- thuhet në reagimin e PD-së.
