Banorët e zonës së Plazhit në Durrës po përballen me një situatë shqetësuese, pasi prej tre ditësh furnizimi me ujë është ndërprerë pothuajse totalisht.
Në mes të dimrit, qytetarët shprehen se mungesa e ujit po e bën jetesën të pamundur, sidomos për familjet me fëmijë të vegjël që duhet të lahen dhe të çohen çdo ditë në shkollë.
Sipas banorëve, situata është absurde për një qytet bregdetar që prej vitesh reklamohet si destinacion turistik, ndërkohë që vetë vendasit detyrohen të përdorin ujë kanalesh për higjienën e banjove në shtëpitë e tyre.
Qytetarët bëjnë me dije se kanë paraqitur disa ankesa pranë Ujësjellësit, por deri më tani nuk kanë marrë asnjë shpjegim zyrtar mbi shkaqet e ndërprerjes dhe asnjë afat për rikthimin e furnizimit.
Denoncimi për JOQ
“Kemi pothuajse 3 ditë që s’vjen uji në zonën e Plazhit. Vende-vende ka probleme, por askush nuk na tregon pse. Kemi fëmijë të vegjël. Nuk e di çfarë po ndodh me qytetin tonë të bukur të Durrësit, që pret të presë turistë në këto kushte.”
Kjo situatë hedh dritë mbi dështimin e Bashkisë dhe kryebashkiakes për të garantuar shërbimet më elementare për qytetarët, duke ngritur pikëpyetje serioze mbi menaxhimin e qytetit dhe prioritetet reale të pushtetit vendor.
