Roja Civile e Spanjës ka çmontuar një grup “skifterësh” shqiptarë që grabisnin biznese dhe shtëpi në disa rajone të vendit iberik, me dëm mijëra euro.
Katër persona u arrestuan dhe u sekuestruan qindra sende me vlerë si ora luksoze, bizhu, para dhe 14 kg drogë e llojit marihuanë.
Organizata kishte një metodë të caktuar operacional “modus operandi”, me role dhe taktikë të planifikuar para sulmeve, ndërsa një pjesë të mirë të mallit të vjedhur, kryesisht bizhuteri ari dhe para, i shkëmbenin me lëndë narkotike, që më pas e shpërndanin dhe siguronin fitime më të mëdha.
Goditjet janë kryer gjatë operacionit të koduar “Viporto” dhe u zhvillua në La Coruna, Vilaboa, Pontevedra, Vigo dhe rajone të tjera.
Autoritetet thanë se shqiptarët kishin role të ndara, ku një prej tyre bënte transportin me makinë. I linte shokët disa km larg nga zona e banuar dhe pastaj të tjerët në këmbë studionin bizneset dhe kryesisht banesat që kishin ndonjë derë apo dritare të hapur dhe të cenueshme. Ata ishin të kujdesshëm, pasi nuk synonin banesat që kishin sistem të fortë sigurie apo kamera.
Gjatë hetimeve që zgjatën disa muaj, llogaritet se grupi ka kryer dhjetëra bastisje, më të fundit gjatë muajit janar, informon media spanjolle “FarodeVigo”.
U sekuestruan ora luksoze, bizhuteri, para, telefona, karta SIM, dhe 14 kg marihuanë që shërbente si mall shkëmbimi për materialet e grabitura.
