Një tjetër skandal i rëndë institucional ka shpërthyer në sektorin e infrastrukturës. Gazetari Almer Toska është paraqitur në SPAK, ku ka depozituar kallëzim penal ndaj Belinda Balluku dhe drejtorëve vartës të saj, lidhur me problematikat e rënda në tunelin e Murrizit, pjesë e Rruga e Arbërit.
Sipas Toskës, kallëzimi është rezultat i një investigimi disa-javor, të zhvilluar në bashkëpunim me portalin Timoni.al, ku janë evidentuar dyshime serioze për abuzime me fondet publike dhe shkelje të rënda të standardeve të sigurisë.
Nga verifikimet kanë dalë dëmtime alarmante strukturore në tunel: çarje betoni, asfalt i dëmtuar, vrima në sipërfaqe dhe rrëshqitje toke — elementë që, sipas gazetarit, përbëjnë rrezik real për jetën e qytetarëve.
Skandali thellohet me sigurimin e një dokumenti zyrtar të Autoritetit Rrugor Shqiptar, ku rezulton se tuneli i Murrizit është hapur për qarkullim pa u kolauduar teknikisht. Një fakt që ngre dyshime të forta se hapja ka qenë vendim politik dhe elektoral, e jo teknik.
Sipas kallëzimit, përgjegjësia politike dhe institucionale bie mbi Edi Ramën, Belinda Ballukun, ARRSH-në dhe zinxhirin e drejtuesve përgjegjës, ndërsa vlera e veprës kap shifrën rreth 40 miliardë lekë, ku dyshohet për abuzim të rëndë me taksat e shqiptarëve.
“Kjo çështje nuk ka ngjyrë politike. Ka vetëm një ngjyrë: të vërtetën dhe jetën e qytetarëve. Heshtja është bashkëfajësi. Unë nuk do të hesht”, deklaron Almer Toska.
