Me plasaritje dhe çarje të shumta në bordurën anësore dhe në tavan, Tuneli i Murrizit, pjesë e Rrugës së Arbrit, po shndërrohet në një rrezik serioz për jetën e udhëtarëve.
Tuneli, i konsideruar si një nga veprat kryesore infrastrukturore në këtë aks, u hap për qarkullim më 14 mars 2025, mes garancive nga qeveria shqiptare se ishte ndërtuar sipas standardeve më të larta teknike dhe se ofronte siguri të plotë për përdoruesit e rrugës.
Megjithatë, pamjet e publikuara së fundmi tregojnë çarje dhe plasaritje të dukshme në anën lindore të tunelit, duke ngritur pikëpyetje të forta mbi cilësinë e punimeve, studimin gjeologjik të zonës dhe mirëmbajtjen nga firma kontraktore.
Në lidhje me problematikën, përfaqësues të kompanisë “Gjoka Konstruksion” kanë deklaruar se dëmtimi i harkut lindor ka ardhur si pasojë e punimeve që po kryhen në tunelin e emergjencës. Sipas tyre, dy tunelet ndodhen në një distancë prej 28–30 metrash nga njëri-tjetri dhe ndërhyrjet kanë ndikuar në lëvizjen e strukturës së tunelit kryesor.
Tuneli i Murrizit ka qenë vazhdimisht në qendër të debateve dhe skandaleve, për shkak të vonesave të shumta në përfundimin dhe hapjen e tij. Përveç kësaj, janë raportuar edhe probleme të përsëritura me funksionimin e ventilatorëve të ajrit, si dhe ndërprerje të energjisë elektrike gjatë funksionimit.
Rruga e Arbrit, një nga projektet më të kushtueshme infrastrukturore në vend, ka kushtuar rreth 450 milionë euro, shifër që përfshin ndërtimin e tunelit dhe segmentet e tjera të aksit që lidh Tiranën me Dibrën. Në raportimet e mëparshme, investimi fillestar ishte parashikuar rreth 350 milionë euro, por kostoja u rrit gjatë punimeve për shkak të vështirësive gjeologjike dhe zgjatjes së kontratave.
Paralajmërimi i gazetarit që ditën e hapjes
Një ditë pas hapjes së tunelit, më 15 mars 2025, gazetari Ariglon Pali publikoi një reagim në rrjetet sociale, ku ngrinte shqetësime serioze mbi cilësinë e ndërtimit të Tunelit të Murrizit.
Ai rrëfente se gjatë udhëtimeve të shpeshta natën në aksin e Burrelit kishte pasur disa herë biseda me inxhinierë turq të angazhuar në punimet e tunelit.
Sipas gazetarit, inxhinierët i kishin shprehur shqetësime të forta për cilësinë e armaturës, duke e cilësuar atë si skandaloze dhe duke shprehur habi se si një tunel i ndërtuar në ato kushte mund të hapej për qarkullim.
Ata, sipas Palit, shpreheshin të frikësuar për pasojat që mund të sillte një tërmet i fortë në zonë.
Gazetari theksonte gjithashtu se, sipas burimeve të tij, inspektoriatet përkatëse nuk kishin kryer kontrolle për cilësinë e punimeve, ndërsa një përpjekje për të marrë mostra betoni për analiza nuk kishte qenë e suksesshme. Ai i bënte thirrje institucioneve dhe ekspertëve që të kryhej një kontroll i plotë dhe transparent i tunelit.
“Panik jo, kujdes po”, shkruante gazetari në reagimin e tij, një paralajmërim që sot, pas shfaqjes së çarjeve dhe plasaritjeve, merr një tjetër peshë.
Postimi i gazetarit me 15 mars 2025
