Qeveria ka shpërblyer pas plot 22 vitesh skafistin e tragjedisë së Otrantos, ku u mbytën 28 persona, duke i zbardhur një super leje për 2 kulla në zonën e Lungomares në Vlorë. Pavarësisht se familjarët apo trashëgimtarët e viktimave e përkujtojnë çdo vit këtë tragjedi, institucionet shtetërore kanë vijuar pa asnjë droje projektin e propozuar nga Viron Robaj, i arrestuar në vitin 2015 në Itali dhe i ekstraduar në Shqipëri.
Drejtësia shqiptare e ka dënuar me 25 vite burg Robajn, teksa nuk ka informacion nëse ai është liruar apo vijon të jetë në burg. Por kjo s’e ka penguar që, në burg apo në gjendje të lirë, të hapë në muajin shtator të vitit 2022 një kompani, të quajtur “EVE CONSTRUCTION” dhe më vonë t’i drejtohet Këshillit Kombëtar të Territorit leje për të ndërtuar 2 kulla.
VoxNews ka siguruar ekskluzivisht lejen e zhvillimit, ku detajohet se çfarë do të ndërtojë 51 vjeçari bashkë me dy firma të tjera. Në këto dokumente shkruhet se KKTU-ja vendosi “miratimin e lejes së zhvillimit për objektin ‘Flatiron Of Vlora’, zhvillim kompleks për ndërtimin e ambjenteve të reja me funksion banim dhe shërbime prej 2, 16, 17, 19, 20 dhe 21 katesh mbi tokë dhe 4 katesh nëntokë”.
Mësohet se projekti do të zhvillohet në rrugën “Dhimitër Konomi”, Bashkia Vlorë, me subjekte zhvilluese shoqëritë “Kumi Konstruksion”, “Semajo” dhe “Eve Construction”, kjo e fundit në pronësi të Viron Robajt.
Në lejen e zhvillimit detajohet se objekti i propozuar, ndodhet në një zonë banimi, ku ndërtimet në krahun perëndimor (vija e parë dhe e dytë e ndërtimit) janë ndërtime me densitet të mesëm, me funksione shërbimi, banimi dhe hotelerie. “Pas kësaj vije, që përbën dhe zonën rrëzë shpatit të kodrës, janë të pozicionuara objekte banimi tip vile, me lartësi 1-3 kate. Kjo silhuetë pritet të ndryshojë ndjeshëm, pasi në këtë zonë janë të planifikuara ndërtimet e objekteve të reja me lartësi të konsiderueshme, të cilat do të përfaqësojnë një stil arkitektonik modern dhe bashkëkohor, krijuar nga arkitektë të njohur ndërkombëtarisht” thuhet në këtë dokument.
Në dokument shkruhet se projekti i propozuar “Flatiron of Vlora”, Vlorë zhvillohet në një truall me sipërfaqe totale prej 854 m². “Me anë të këtij projekti, paraqitet një qasje ndryshe e projektimit të ndërtesave rezidenciale, në dallim me atë që gjendet prezent në zonë. Ndërtesa parashikon përfshirje te funksioneve të shërbimit në katin përdhe, sikurse banimit, i cili do të jetë i shtrirë përgjatë gjithë lartësisë së objektit” vijon dokumenti.
Më tej citohet se objekti i propozuar është një projekt që ndërthur modernitetin dhe trashëgiminë kulturore në një mënyrë unike. “Një nga karakteristikat dalluese të fasadës është përfshirja e motiveve tradicionale shqiptare, të cilat janë përdorur për të pasuruar estetikën e objektit. Motivet e qilimit, me linjat e tij të forta zig-zag, janë të integruara fasadë dhe mbështjellin të gjithë ndërtesën, duke krijuar një element dinamik dhe tërheqës në lartësi” thuhet në dokumente.
VoxNews shfletoi dokumente nga Qendra Kombëtare e Regjistrimit ku rezulton se kompania EVE CONSTRUCTION është themeluar në datën 26 shtator të vitit 2022 nga pronari Viron Robaj, shtetas shqiptar i datëlindjes 28 marsj 1974.
“Vlera e kapitalit të kontribuar dhe i regjistruar në shoqëri është 300.000 lekë” thuhet në aktin e themelimit. Pra, me vetëm 300 mijë lekë, Robaj bashkë me dy kompani të tjera do të ndërtojnë 2 kulla në një zonë tepër të lakmuar.
Një leje pas së cilës ngrihen shumë dyshime për shkak të pronarit të një prej firmave, të kaluarën e tij apo edhe të kapitalit. Kohët e fundit qeveria dhe Ministria e Financave ka deklaruar se do të verifikojë kapacitetet e firmave ndërtuese për burimin e të ardhurave. A do t’a verifikojë këtë kompani?
©Copyright Vox News
