Policia e Shkodrës ka identifikuar dhe arrestuar autorin e grabitjes së ndodhur më 24 janar 2026, në lagjen “Vojo Kushi”.
Në pranga ka rënë 27-vjeçari Gjionata Kola, i dyshuar për vjedhjen e një shume parash në një institucion financiar.
Sipas njoftimit zyrtar, Kola ka hyrë në ambientet e bankës dhe ka kanosur punonjësit me një mjet të fortë, konkretisht një çekiç. Pas kërcënimit, ai ka arritur të marrë 143 500 lekë dhe është larguar nga vendngjarja.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, ku Kola do të përballet me akuzën për veprën penale “Vjedhja me dhunë”.
