Shumica prej nesh kanë marrë të paktën një dhuratë Krishtlindjeje që nuk na ka pëlqyer, një pulovër që nuk na rri mirë, një zbukurim i shëmtuar apo një parfum që nuk na shkon. Jo çdo dhuratë sjell gëzim, ndaj në vend që t’i fshehim në dollap, si mund t’i heqim qafe pa ofenduar askënd?
- Ripërdore dhuratën
Për Dawn-Maria France nga North Yorkshire, zgjidhja është e thjeshtë: jepja dikujt tjetër! Ajo thotë se menjëherë pas Krishtlindjes është koha ideale. Nuk ndjen aspak faj dhe beson se është një mënyrë më e mirë për të festuar. Një vit ajo mori fara bimësh që nuk i duheshin, ndaj ia dhuroi një mikeshe që merrej me kopshtari. “Është një mënyrë ekonomike për të menaxhuar shpenzimet, sidomos në krizën e kostos së jetesës, dhe më ka ndihmuar të çliroj shtëpinë nga gjërat e panevojshme,” thotë ajo.
BBC shkruan se çdo vit në Mbretërinë e Bashkuar hidhen dhurata të padëshiruara me vlerë rreth 42 milion paund, disa përfundojnë në landfill. Dawn-Maria i rimbështolli farat duke shtuar një shënim personal: “M’u dhuruan mua, por e dija që ty do të të pëlqenin.”
- Fshih gjurmët
Ekspertja e etiketës Antoinette Akanji thotë se dhuruesi i parë nuk duhet të rrezikojë të takojë marrësin e ri. Louise Minchin nga BBC këshillon të hiqen etiketat ose kartat e adresuara dikujt tjetër. Dhurata duhet kontrolluar mirë për të parë nëse është e hapur apo e dëmtuar. Një dhuratë e hapur ose e paplotë tregon qartë se nuk është e re.
Kate Bottley kujton se një herë harroi të hiqte një kartë brenda dhuratës që ripërdori. “Ata e hapën dhe unë thashë ‘Oh jo, më vjen keq’,” rrëfen ajo. Për të shmangur sikletet e tilla, Akanji këshillon: mos ripërdorni dhurata brenda të njëjtit rreth shoqëror!
- Shiti
Kirsty Quinn, 36 vjeç nga Oxfordshire, fiton rreth 500 paund në muaj duke rishitur sende në platforma si eBay dhe Vinted. Ajo thotë se shitja e dhuratave të padëshiruara ndihmon dikë tjetër t’i blejë më lirë dhe i jep mundësi shitësit të përdorë paratë për diçka që i duhet vërtet.
Sipas Vinted, e diela e parë e vitit ka një rritje të madhe të listimeve të dhuratave të padëshiruara. Artikujt më të shitur pas Krishtlindjes janë veshjet, produkte kozmetike, bizhuterit dhe pajisje elektronike. Platforma këshillon përdorimin e një emri përdoruesi jo të identifikueshëm dhe foto neutrale.
- Dhuro për bamirësi
Nëse ripërdorimi nuk duket i përshtatshëm e as shitja, dhurimi për bamirësi është një opsion i shkëlqyer. Pikat e bamirësisë presin me padurim pastrimin e shtëpive pas Krishtlindjes, kur dhuratat e padëshiruara bëhen thesare për të tjerët.
Allison Swaine-Hughes nga British Heart Foundation thotë: “Nëse keni zbukurime që nuk përshtaten, lojëra tavoline apo një pulovër që nuk ju pëlqen, pse të mos i dhuroni që të ndriçojnë shtëpinë apo garderobën e dikujt tjetër?”
- Përfshini dhe faturën e dhuratës
Nëse jeni ju dhuruesi, mund ta lehtësoni marrësin duke përfshirë faturën e dhuratës. Kjo i jep mundësinë ta ndërrojë ose të marrë një kupon. Në disa raste ofrohet edhe rimbursim, sipas politikës së dyqanit. Pa faturë, gjërat bëhen të sikletshme, ndaj rekomandohet sinqeriteti: “Më vjen keq, por do të doja ta ndërroja këtë, a ke faturën?”/BBC
