Një operacion i gjerë antidrogë i Policisë së Tiranës ka çuar në arrestimin e 22 personave, të dyshuar si pjesë e një grupi kriminal të strukturuar që vepronte në fushën e trafikut dhe shpërndarjes së lëndëve narkotike. Aksioni ka shkaktuar tronditje të fortë institucionale, pasi mes të arrestuarve dhe personave nën hetim rezultojnë edhe punonjës dhe drejtues të kompanisë telefonike ONE Albania.
Sipas burimeve zyrtare, në pranga kanë rënë edhe:
Erald Sina, Drejtues i Departamentit të Zyrave dhe Pasurisë në ONE Albania
Artan Pullazi, Team Leader në ONE Albania
Nën vëzhgim prej 4 javësh
Burime pranë hetimit bëjnë me dije se policia i mbante nën vëzhgim prej rreth katër javësh personat e dyshuar, gjatë të cilave janë kryer përgjime, ndjekje fizike dhe verifikime të shumta. Sipas të njëjtave burime, dy drejtuesit tek One Albania dyshohet se kanë qenë të përfshirë prej kohësh në aktivitetin e shitblerjes së lëndëve narkotike, duke shfrytëzuar lidhje dhe kontakte të krijuara ndër vite.
Goditja pas hetimeve disa-javore
Pas përfundimit të hetimeve 4-javore, autoritetet kanë ndërmarrë goditjen finale në disa zona të Tiranës dhe rrethinat e saj. Gjatë operacionit janë kryer kontrolle në banesa dhe ambiente të ndryshme, ku disa prej të arrestuarve janë kapur në flagrancë me lëndë narkotike të llojit kokainë dhe kanabis.
Episod gjatë arrestimit
Një episod i pazakontë raportohet të ketë ndodhur gjatë momentit të arrestimit të njërit prej drejtuesve, i cili, sipas burimeve, u është drejtuar efektivëve me fjalët:
“A e dini kush jam unë? S’keni shans të më arrestoni.”
Pavarësisht kësaj, policia ka vijuar procedurat dhe ka kryer arrestimin, duke theksuar se askush nuk është mbi ligjin.
Hetimet vijojnë
Prokuroria pritet të japë detaje të mëtejshme mbi rolet konkrete të secilit të dyshuar, ndërsa nuk përjashtohen arrestime të tjera dhe zgjerimi i hetimeve në radhët e personave të lidhur me këtë rrjet.
Të gjithë të arrestuarit dyshohen për veprat penale që lidhen me trafikun e narkotikëve dhe grupin e strukturuar kriminal, ndërsa çështja mbetet në fazë hetimore.
