Sipas SPAK vonesat në çështjen ndaj ish-kryebashkiakut të Tiranës, Erion Veliaj,nuk lidhen me organin e akuzës, por me mungesat dhe kërkesat e pajustifikuara të mbrojtjes.
Sipas SPAK, çështja penale nr. 27/2024 i është dërguar Gjykatës së Posaçme më 10 shtator 2025, ndërsa seanca e parë është caktuar më 29 shtator 2025. Megjithatë, që nga ajo datë janë shtyrë tetë seanca radhazi, për shkak të mungesave të avokatëve mbrojtës dhe kërkesave që janë konsideruar të pabazuara në ligj.
Gjithashtu , Prokuroria e Posaçme thekson se ka përmbushur plotësisht të gjitha detyrimet ligjore në lidhje me njohjen e të pandehurit me aktet e dosjes. Sipas SPAK Veliaj dhe mbrojtësit e tij kanë marrë kopje të plotë të materialeve hetimore më 24 korrik 2025.
Ndërkohë, Veliaj në disa prej seancave ka thënë se nuk është njohur me aktet pasi nuk i është vënë në dispozicion dosja fizike, por vetëm një USB të cilën nuk e lexon dot pas nuk ka laptop në qeli.
Veliaj ndodhet në paraburgim prej shkurtit të këtij viti dhe akuzohet për pastrim parash, mosdeklarim pasurie, korrupsion pasiv në 9 episode, shpërdorim detyre si dhe futje të sendeve të ndaluara në qeli.
