Udhëtarët në rrezik! Rruga e vjetër Kukës–Kalimash–Shënmri–Pukë drejt degradimit, kompania “Geci” asnjë ndërhyrje

Rruga e vjetër që lidh Kukësin me Kalimashin, Shënmrinë dhe Pukën po shfaq çdo ditë e më shumë shenja serioze degradimi. Gjatë gjithë gjatësisë së saj, shtresa asfaltike është dëmtuar rëndë, me çarje të shumta dhe gropa të thella që krijojnë vështirësi të mëdha për drejtuesit e automjeteve.

Situata paraqitet edhe më alarmante në njërën prej urave të këtij segmenti, e cila ka pësuar dëmtime të konsiderueshme në strukturë, duke rrezikuar drejtpërdrejt sigurinë e udhëtarëve.

Ndërkohë, kompania kontraktore “Geci”, që administron aksin nga Fushë-Dukagjini deri në Qafë-Shllak, përfshirë edhe këtë rrugë, nuk ka kryer asnjë ndërhyrje të dukshme për mirëmbajtjen e saj. Për dëmtime në ura apo ndërhyrje të thella strukturore, kompania nuk ka kompetencë financiare të drejtpërdrejtë, pasi këto kërkojnë projekte të veçanta dhe fonde të miratuara nga Autoriteti Rrugor Shqiptar.

Sipas “Geci”, projekti për ndërhyrjen në urë është hartuar dhe tashmë i është dërguar ARRSH-së, në pritje të alokimit të fondeve për fillimin e punimeve.