Një grabitje ka tronditur zonën e Nimes në Francën jugore, ku tre persona të armatosur hynë me forcë në shtëpinë e një biznesmeni 56-vjeçar dhe e mbajtën peng së bashku me djalin e tij.
Sipas mediave franceze, ngjarja ndodhi mbrëmjen e djeshme, kur pronari i një kompanie pajisjesh mjekësore u largua nga zyra rreth orës 19:00.
Me të mbërritur në banesën e tij në Cachargues, grabitësit e detyruan 56-vjeçarin të hynte brenda, ku ndodhej edhe djali i tij 22-vjeçar.
Të dy u mbajtën peng dhe u kërcënuan me armë, ndërsa autorët ushtruan edhe dhunë fizike ndaj kryefamiljarit.
Nën kërcënimin e armëve, ata u detyruan t’u dorëzonin grabitësve: rreth 10 ora dore luksoze, me vlerë të përllogaritur 1 milion euro, tre unaza, një byzylyk, si dhe telefona celularë.
Në shtëpi gjatë ngjarjes ndodhej edhe djali i dytë, 19 vjeç, i cili u fsheh dhe arriti të telefononte policinë pasi dëgjoi zhurmat dhe britmat. Kur forcat e rendit mbërritën, gjetën 56-vjeçarin me dëmtime në kokë.
Pak më vonë, automjeti luksoz i biznesmenit u gjet i përfshirë nga flakët në një rrugë pranë Nîmes. Hetimet paraprake tregojnë se grabitësit e braktisën dhe u larguan me një mjet tjetër.
Policia franceze ka nisur një operacion të gjerë për identifikimin dhe kapjen e autorëve të grabitjes së armatosur.
