Shqipëria pret sot Anglinë në “Air Albania”, në ndeshjen e vlefshme për fazën e grupeve të kualifikuesve të Botërorit.
Në kuadër të ndeshjes, duke nisur nga ora 14:00 do të bllokohen disa akse rrugore të kryeqytetit. Konkretisht do të ketë bllokime në këto akse:
Rruga “Papa Gjon Pali II”;
Rruga “Dervish Hima”, pranë ambasadës së SHBA-së;
Rruga “Asim Zeneli”, pranë ambasadës së SHBA-së;
Rruga “Themistokli Gërmenji”;
Rruga “Ismail Qemali”, kryqëzimi i Liceut;
Rruga “Mustafa Matohiti”, pranë shkollës “Kosova”;
Rruga “Jul Variboba”, pranë postës;
Rruga “ Lekë Dukagjini”, pranë ish-Gardës së Republikës;
Rruga “Avdyl Frashëri”, pranë kryqëzimit të Librit Universitar;
Rruga “Skerdilajd Llagami”;
Rruga “Faik Konica”.
Në zbatim të planit të masave, punonjësit e Policisë do të ushtrojnë kontroll të imtësishëm ndaj tifozëve, me qëllim parandalimin e hyrjes në stadium, të banderolave me përmbajtje raciste, të fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve, mjeteve/produkteve për përdorim kozmetik dhe sendeve të tjera të forta, të rrezikshme për jetën dhe shëndetin e pjesëmarrësve.
Hyrja në fushën e lojës gjatë kohës së zhvillimit të aktivitetit sportiv nga persona të paautorizuar, përbën kundërvajtje penale dhe dënohet me gjobë nga 50 000 deri në 100 000 lekë. Hedhja e sendeve të forta në fushën e lojës ose mbi njerëzit, mbajtja apo përdorimi i lëndëve piroteknike, fishekzjarrëve, flakadanëve dënohen me burgim nga gjashtë muaj deri në tre vjet.
Hyrja në stadium e tifozëve dhe e sportdashësve që kanë blerë biletë, fillon në orën 15:00.
