Elvis Kosova, i cili u raportua se ishte pronari i automjetit me të cilin po udhëtonin Gilmando Dani dhe Muçi Shaljani, ka bërë një reagim në rrjetet sociale.
Në një koment të bërë në një postim ku emri i tij lidhej me atentatin në Rinas, Kosova është shprehur se nuk mban mend të ketë pasur ndonjë makinë të tillë dhe se mjeti është në emër të kompanisë.
“As nuk e mbaj mend ta kem pasur ndonjëherë këtë makinë. Nuk është në emrin tim fare, është në emër të kompanisë. Sa makina hyjnë e dalin nga kompanitë e mia, s’di, s’kam fjalë me këto. Zot na ruaj”, shkruan Vis Kosova në një koment në rrjete sociale.
Kujtojmë se Kosova njihet si biznesmen në fushën e shitblerjes së automjeteve. Verën e këtij viti, atij iu vendos një sasi lënde plasëse në portën hyrëse të garazhit të tij në zonën e “Liqenit të Thatë” në Tiranë.
Në gusht të vitit 2024, Kosova u ndalua për vjedhjen e një makine luksoze “Audi R8”, me vlerë rreth 200 mijë euro, që ishte sjellë fillimisht nga Gjermania nga një turk, dhe më pas ishte përvetësuar nga Kosova përmes mashtrimit.
