Një atentat ka tronditur sot Shkodrën, ku një sasi lënde plasëse ka shpërthyer në një automjet. Ngjarja ka lënë të plagosur drejtuesin e tij. Policia ka konfirmuar zyrtarisht detajet e ngjarjes, duke identifikuar personin e lënduar dhe rrethanat e shpërthimit.
Sipas policisë: Shpërthimi ndodhi rreth orës 11:35 në lagjen “Ndoc Mazi”, e njohur ndryshe si zona “Arra e Madhe”. Sipas njoftimit të Policisë, lënda plasëse ka shpërthyer në momentin që shtetasi Enea Buzukja (E. B.), 38 vjeç, ka ndezur automjetin e tij, duke treguar se tritolli ishte vendosur poshtë ose brenda mjetit.
I plagosuri, Enea Buzukja, është punonjës i administratës, më konkretisht i Tatimeve në Shkodër. Ai është dërguar menjëherë në spital dhe aktualisht ndodhet jashtë rrezikut për jetën, pavarësisht lëndimeve të marra.
Grupi hetimor, nën drejtimin e Prokurorisë, ka nisur punën në vendngjarje për të mbledhur prova, zbardhur rrethanat e plota të atentatit, si dhe për të identifikuar dhe kapur autorin/ët.
Po hetohet nëse sulmi lidhet me detyrën e tij zyrtare dhe funksionin në administratë, apo me ndonjë konflikt të mundshëm personal.
