Kryetarja e bashkisë Tiranë, Anuela Ristani, nuk i lë shokët në baltë. Valter Bega është në burg, i akuzuar nga SPAK për korrupsion dhe pastrim parash, por Anuela i jep tenderat bashkëshortes së tij, Loreta Valljas. Biznesi këtë radhë bëhet me paratë e rindërtimit nga tërmeti. Janë ca punë që i ka lënë përgjysmë Lali Eri dhe i vazhdon Anuela.
Bëhet fjalë për tenderin me objekt: Loti XVIII: “Aktekspertizë e thelluar për “Riaftesimi strukturor i ndërtesës nr. 31 (9), Qendër e Vjetër, Krrabë”, me fond limit 1 020 000,00 pa TVSH.
Tenderi është mbajtur më 25 gusht 2023, në një procedurë ku duket qartë se fituesi është i paracaktuar. Nga tre studio pjesëmarrëse, 2 janë përjashtuar menjëherë nga gara, megjithëse kishin oferta më të ulëta se sa kompania fituese.
Tenderi është shënuar nga Open Data Albania” me “Flamur të kuq” që është shenja e riskut të korrupsionit.
Në fakt, këto procedura zhvillohen formalisht sepse fituesit dihen qysh më parë. Më 30 shtator 2025, Anuela Ristani ka shpallur fituese kompaninë ‘Net Group” shpk, pronare e së cilës është Loreta Vallja, bashkëshortja e Valter Begajt, biznesmenit të arrestuar nga SPAK.
Pas arrestimit, Begaj ia ka dhuruar kompaninë bashkëshortes, që të mos ia sekuestrojë SPAK, ndërkohë që duhet të vazhdojnë të rrjedhin paratë tenderat në arkën e “Net Gruop” shpk.
Dhurimi është bërë më 4 dhjetor 2025, ku para noteres ka qenë vetëm bashkëshortja e Valterit. Ajo ka paraqitur një prokurë dhe e ka marrë kompaninë në pronësinë e saj 100%.
Një ditë para këtij veprimi noterial, në 3 dhjetor 2024, drejtori i Fondit Shqiptar të Zhvillimit, Dritan Agolli, i përfshirë në afera flagrante korruptive me oligarkët Bashkim Ulaj dhe Shkëlqim Fusha, i ka dhënë një tender me vlerë 70 mijë euro kompanisë NET-GROUP. Bëhet fjalë për tenderin e shërbimit të mbikqyrjes së punimeve për investime për infrastrukturën e tregjeve, hapësirave tregtare, multifunksionale, rrugë tregetare në zona model zhvillimi, etj. Faza II.
Në kohën kur Dritan Agolli ka firmosur tenderin për kompaninë NET-GROUP, Valter Begaj ishte pronar në kompaninë fituese, edhe pse kishte disa muaj në burg për korrupsion me tendera dhe pastrim parash.
Biznesmeni Valter Begaj, ortak i ish kreut të ARSH-së Evis Berberi, konsiderohet nga SPAK-u si personi kyç që ka shërbyer për të pastruar paratë e përfituar përmes tenderave nga ish drejtori i ARRSH-së. Sipas dosjes së SPAK-ut, njohjet mes Berberit dhe Begajt janë shumë të hershme, përpara se ish drejtori i ARRSH-së të merrte detyra në ministrinë e Infrastrukturës dhe Energjitikës. Me marrjen e kësaj detyre, Berberi i shiti aksionet e kompanisë DAAM te shtetasi Valter Begaj, për vlerën e 1.7 milionë eurove, ndërsa i kishte blerë për vetëm 800 euro.
Përveç aksioneve të DAAM, Begaj ishte zotërues dhe i kompanisë NET-GROUP (ish “B-VAAL ENGINEERING”), e cila rezulton që të jetë dhe kompania që ka fituar tenderat në mënyrë jo të ligjshme nga ana e Berberit. Në mars të këtij viti, me kërkesë të SPAK u arrestua Ervis Berberi bashkë me dy miqtë e tij Valter Begaj dhe Ervis Lami për korrupsion dhe pastrim parash.
