Komisioni Shtetëror i Zgjedhjeve në Maqedoninë e Veriut ka shpërndarë materialin zgjedhor në komisionet komunale për zgjedhjet lokale që mbahen të dielën.
Në 80 komuna dhe Qytetin e Shkupit gjithsej kanë të drejtë vote mbi 1.8 milionë persona, ndërsa procesi zhvillohet në 3480 vendvotime. Në garë janë 309 kandidatë për kryetarë komunash dhe 576 lista kandidatësh për anëtarë të këshillave komunalë.
Nga mesnata e së shtunës deri të dielën në orën 19:00, kur është edhe orari i mbylljes së vendvotimeve, subjektet politike në Maqedoninë e Veriut janë në heshtje zgjedhore.
Megjithatë një kategori e caktuar, ku përfshihen të sëmurët, të moshuarit në shtëpitë e kujdesit, të dënuarit dhe ata që ndodhen në paraburgim, ushtron të drejtën e votës që të shtunën.
Për herë të parë në këto zgjedhje do të votojnë mbi 25 mijë votues të rinj që kanë mbushur 18 vjeç. Komisioni Shtetëror Zgjedhor ka akredituar mbi 1300 vëzhgues të huaj dhe vendas.
Gjatë 20 ditëve fushatë elektorale për zgjedhjet lokale, e cila filloi më 29 shtator dhe u mbyll më 17 tetor, kandidatët për kryetar komunash, përfshirë edhe ata nga koalicionet shqiptare VLEN dhe Aleanca Kombëtare për Integrim, patën mundësi të prezantojnë programet e tyre para qytetarëve.
