Një incident i rëndë është shënuar të dielën në aeroportin e Dortmundit, ku kompania Wizz Air ka lënë dhjetëra pasagjerë shqiptarë në tokë, pasi kishte shitur më shumë bileta se numri i vendeve në avionin e planifikuar për në Tiranë.
Sipas një denoncimi të mbërritur në redaksinë e Skyweb.al, fluturimi W4 5126 Dortmund–Tiranë, i planifikuar të nisej në orën 15:45, u vonua pasi stafi gjerman i aeroportit zbuloi se kompania kishte kryer overbooking, duke shitur më shumë bileta se kapaciteti i avionit.
Pasagjerët shqiptarë janë përballur me një situatë absurde, ndërsa stafi i Wizz Air i ka njoftuar se “nuk ka më vende të lira në avion”. Disa prej udhëtarëve kanë mbetur në sallën e pritjes pa asnjë zgjidhje dhe pa informacion të qartë mbi rimbursimin apo riorganizimin e fluturimit.
Në një akt papërgjegjshmërie, kompania u ka ofruar pasagjerëve të lënë në aeroport mundësinë për të fluturuar vetëm të mërkurën, duke u justifikuar se vetëm atëherë do të ketë vende të lira për udhëtim drejt Tiranës.
Kjo nuk është hera e parë që Wizz Air bën abuzime të tilla.
Kompania vijon të përdorë praktikën e shitjes së biletave mbi kapacitetin e avionëve, me strategjinë se një pjesë e udhëtarëve zakonisht nuk paraqiten në fluturim.
Por kur të gjithë mbërrijnë në aeroport, shumë pasagjerë mbeten jashtë avionit.
Sipas të dhënave nga sektori i aviacionit, Wizz Air po përballet edhe me probleme teknike, pasi 38 avionë të saj janë aktualisht jashtë funksioni për shkak të defekteve të motorëve, duke shkaktuar vonesa dhe anulime të shumta në linjat evropiane. /skyweb.al
