Ironia e shtetit shqiptar nuk ka fund: në vend që ta hetojë për aferat e tij të shumta me tendera të dyshimtë në shëndetësi, vetë Policia e Shtetit ka vendosur t’i japë një tjetër kontratë të majme oligarkut greko-shqiptar Janis Karathanos.
Sipas të dhënave zyrtare në Agjencinë e Prokurimit Publik, Drejtoria e Përgjithshme e Policisë së Shtetit ka shpallur fitues të tenderit me numër reference REF-61115-09-11-2025 kompaninë PEGASUS, në pronësi të Karathanos. Objekti i tenderit është “Mirëmbajtje 3-vjeçare për aparaturat e GC/MS.” me një fondi limit prej 13,920,000 lekë të reja pa TVSH ose rreth 167 milionë lekë të vjetra me TVSH). Shihet ndërkohë se vlera fituese është 13,917,000 lekë të reja pa TVSH, pra 99.97% e fondit limit!
Kompania fituese ka marrë kontratën me një diferencë qesharake prej vetëm 3 mijë lekësh më pak se fondi maksimal i parashikuar nga policia, një tregues klasik i një tenderi të paracaktuar.
Dyshimet shtohen edhe më shumë nga fakti se PEGASUS ka qenë i vetmi operator ekonomik që mori pjesë në garë. Asnjë konkurrent tjetër, asnjë garë reale, vetëm një fitues i gatshëm për të marrë paratë publike.
Kush është Janis Karathanos?
Emri i Janis Karathanos është i njohur në botën e tenderave publikë. Ai është cilësuar si “oligarku i shëndetësisë”, që ka përfituar miliarda lekë nga kontrata dhe koncesione të dhëna nga qeveria në sektorin e shëndetësisë.
Karathanos është përfituesi kryesor i koncesionit të laboratorëve prej 130 milionë euro, një marrëveshje që për vite me radhë i detyroi qytetarët të paguanin shërbime bazike në privat, pasi spitalet publike nuk i ofronin më.
Në sistemin e “miqësive” me ministra dhe nëndrejtorë, Karathanos ka ndërtuar një perandori biznesi që, sipas shumë zërave, ushqehet nga sekserët e pushtetit dhe përqindjet e mëdha që ndahen në prapaskenë.
Tani, pas koncesioneve dhe miliona eurove nga shëndetësia, Policia e Shtetit i jep vetë një tender të ri prej gati 170 mijë euro për mirëmbajtjen e aparaturave laboratorike. Në një vend normal, një njeri me kaq shumë akuza do ishte në ndjekje penale. Ndërsa në Shqipëri, e shpërblejnë me kontrata publike, madje nga vetë Policia e Shtetit.
/JOQ/
