Çmimet Nobel për Kimi, Fizikë dhe Fiziologji ose Mjekësi do të shpallen këtë javë, ndërsa pritshmëritë janë të larta për disa prej zbulimeve më revolucionare të dekadës së fundit. Megjithëse lista e kandidatëve mbetet sekrete për 50 vjet, ekspertët kanë identifikuar disa përparime të fuqishme që kanë transformuar mënyrën si trajtohen sëmundjet apo si konceptohet teknologjia.
Në fushën e mjekësisë, kandidatët kryesorë përfshijnë zhvilluesit e ilaçit semaglutide (GLP-1), që ka revolucionarizuar trajtimin e obezitetit dhe diabetit të tipit 2, si dhe shkencëtarët që qëndrojnë pas një trajtimi të ri për fibrozën cistike, e cila deri para pak vitesh konsiderohej sëmundje fatale.
Në fizikë, vëmendja është përqendruar tek pionierët e informatikës kuantike, përfshirë David DiVincenzo dhe Daniel Loss, për punën e tyre mbi kubitët njësitë bazë të kompjuterëve kuantikë.
Ndërkohë, një tjetër fushë në rritje është studimi i mikrobiomës njerëzore, e cila po ndryshon rrënjësisht kuptimin tonë për shëndetin e zorrëve dhe ndikimin e mikrobeve në organizmin e njeriut.
Çmimet Nobel do të shpallen gjatë javës në vazhdim në Stokholm dhe Oslo, dhe komuniteti shkencor pret me padurim të shohë se cilat nga këto arritje do të marrin vlerësimin më të lartë në botë.
