Reperi dhe producenti Sean “Diddy” Combs raportohet se po mban sesione frymëzuese me të burgosurit në Qendrën Metropolitane të Paraburgimit në Brooklyn, ku ndodhet i ndaluar që nga shtatori 2024.
Sipas një letre të paraqitur nga një tjetër i burgosur, Ho Wen Kwok (i njohur gjithashtu si Miles Guo), para shpalljes së dënimit të tij më 3 tetor, Diddy ka krijuar një program të titulluar “Lojë e lirë me Diddy-n”, përmes të cilit ndan përvoja personale dhe mësime nga jeta, biznesi dhe karriera e tij në industrinë muzikore.
“Është hera e parë që shoh një repart të tërë të marrë pjesë në një klasë ku nuk ka ndasi racore apo bandash, vetëm dëshirë për dije dhe mençuri,” shkruan Kwok në letër.
Ai e përshkruan Diddy-n si një “njeri të sjellshëm, empatik dhe karizmatik”, duke theksuar se e ka parë vetë përkushtimin e tij gjatë përgatitjes për këto mësime, si dhe vullnetin për të frymëzuar të tjerët.
Sipas tij, të dy kanë diskutuar gjithashtu mundësinë e krijimit të programeve të posaçme për të ndihmuar të rinjtë të qëndrojnë larg rrugës, përmes muzikës dhe sportit.
Diddy u shpall fajtor në korrik për dy akuza të lidhura me prostitucionin pas një gjyqi dy-mujor, ndërsa u shpall i pafajshëm për tre akuza të tjera më të rënda: trafikim njerëzor dhe zhvatje.
