Pak para nisjes së Samitit të 7-të të Komunitetit Politik Europian që po zhvillohet sot në Kopenhagen, Kryeministri shqiptar Edi Rama shkaktoi të qeshura dhe befasi, duke ironizuar gafën e Presidentit amerikan, Donald Trump.
Në një video që është bërë virale në rrjetet sociale, Rama iu drejtua presidentit francez Emmanuel Macron me humor:
“Ti duhet të kërkosh falje, këtu, ne të dyve, sepse nuk na urove për marrëveshjen e paqes që Presidenti Trump bëri mes Shqipërisë dhe Azerbajxhanit.”
Gafa e Trump-it kishte ndodhur gjatë një fjalimi zyrtar, kur ai përmendi Shqipërinë në vend të Armenisë, duke deklaruar se “është shuar konflikti me Azerbajxhanin”.
Reagimi i Ramës ka shkaktuar të qeshura dhe komente të shumta në rrjetet sociale, duke treguar se kryeministri shqiptar nuk humb asnjë mundësi për të tërhequr vëmendjen ndërkombëtare dhe për të ironizuar gafat diplomatike.
Samiti i 7-të i Komunitetit Politik Europian po mblidhet sot në Kopenhagen dhe sjell së bashku udhëheqës nga 27 vendet anëtare të BE-së dhe përfaqësues nga 22 shtete të tjera, përfshirë kryeministrin shqiptar Edi Rama dhe presidenten e Kosovës, Vjosa Osmani.
Në fokus të samitit janë mbështetja për Ukrainën, siguria dhe stabiliteti i kontinentit, si dhe çështje të tjera gjeopolitike dhe ekonomike.
