Korporata e Investimeve Shqiptare ka anuluar ndërtimin e stadiumit “Niko Dovana” në Durrës, ku privati do ndërtonte impiantin sportiv dhe në këmbim do të merrte pronësinë e kullave në projekt. Shkak është bërë se asnjë nga firmat nuk paraqiti një ofertë, duke ngjallur hije të mëdha dyshimi se e gjitha ka një prapaskenë.
Në fakt, të tilla projekte shtyhen dhe anulohen në fazat e para, pasi firmat nuk bien dakord për të negociuar me Korporatën në ndarjen e përqindjes së ndërtimit. Në dokumente është specifikuar se shteti merr minimalisht 45 % të të gjithë ndërtimit si dhe stadiumin, por duket se kjo i ka “trembur” firmat, të cilat kanë filluar edhe një lojë.
Ka dyshime se gjithçka bëhet me qëllim që Korporata të ulë përqindjen e ndërtimit që do të marrë ose do të veprojë njësoj si në rastin e ndërtimit të stadiumit të Vlorës, duke i shtuar projektit fillestar edhe disa kulla të reja.
Trualli i Stadiumit të Durrësit nuk është fort i preferuar nga ndërtuesit, pasi nuk është në qendër, në zonën muzeale apo në afërsi të detit. Pikërisht vendi ku ndodhet dhe ndoshta edhe kullat apo godinat që e rrethojnë nuk e kanë bërë të preferuar.
Në njoftim KISH shkruan se s’pati asnjë firmë të interesuar. Ky vendim disa javë pasi Korporata hapi thirrjen dhe pas transferimit të pronave shtetërore në Durrës te KISH.
Sipas vendimit të Këshillit të Ministrave, Korporata do të veprojë si zhvillues i pronave, qoftë drejtpërdrejt, qoftë përmes entiteteve që mund të krijojë. Korporata ishte e autorizuar të hapë procedurë konkurruese për përzgjedhjen e një partneri privat që do të realizojë zhvillimin e pronës përmes një marrëveshjeje sipërmarrjeje.
“KISH mund të negociojë dhe lidhë kontrata me subjekte private, për realizimin e projektit, si dhe të ndërveprojë me Agjencinë e Kadastrës dhe institucionet përgjegjëse për planifikimin dhe zhvillimin e territorit”, thuhej në vendim. Vendimi i mëparshëm i qeverisë i ngarkonte Fondit Shqiptar të Zhvillimit realizimin e këtij projekti, vendim i cili tashmë është i shfuqizuar.
Pas dështimit të thirrjes duket se Korporata do të veprojë njëjtë me projektin e stadiumit të Vlorës, ku tashmë në atë vend do të ketë 10 kulla, mes të cilave edhe një me 40 kate. Korporata e Investimeve Shqiptare ka ndryshuar thuajse tërësisht projektin e studios belge XDGA, që u shpall fituese në konkursin ndërkombëtar duke shtuar kulla pafundësisht. Varianti fillestar i studios belge përmbante vetëm 4 kulla me lartësi 50 metër secila në kompleksin sportiv. Por varianti i ri, i ndryshuar parashikon 10 kulla mes të cilave dhe një më lartësi 40 kate.
/Vox News/
